Казакстандын баш калаасы Астананын акими Женис Касымбек дем алыш күндөрү тажикстандык жер-жемиштердин жармаңкесинде шаардыктар маданиятынын деңгээлинин төмөндүгүн көрсөттү деп билдирди.
Шаар башчысынын айтымында, айрымдар декорацияларды бузуп, жер-жемиш тизилген текчелерди талкалаган.
"Бул - маданияттын төмөндүгүнүн, бирөөнүн эмгегин баалабастыктын көрсөткүчү. Айрымдардын жосунсуз иш-аракеттеринен улам Астананын бардык тургундарына көө жабылды", - деп жазды аким Фейсбуктагы баракчасына.
Социалдык тармактарга Астананын айрым тургундары жер-жемиштерди талап жатканы чагылдырылган видео тараган.
Тажикстандын айыл чарба продукцияларынын, улуттук тамактарынын көргөзмө-жармаңкеси Астанадагы ЭКСПО аянтында өткөн. Тажикстандын Казакстандагы Маданият күндөрүнүн алкагында уюштурулган иш-чаранын ачылышы эки мамлекеттин президенттеринин катышуусунда өткөн.
