Еврокомиссиянын төрайымы Урсула фон дер Ляйен Москванын Кара деңиз портторунан украин данын экспорттоого шарт түзгөн келишимди токтотуп жатканын айыптады. Ал Евробиримдик дүйнө калкынын аялуу катмарын азык-түлүк менен камсыздоо багытындагы аракеттерин уланта берерин билдирди.
АКШнын Бириккен Улуттар Уюмундагы өкүлү Линда Томас-Гринфилд Кремлдин кадамын "ырайымсыздык" деп атады. Ал 17-июлда БУУнун Нью-Йорктогу штаб-квартирасында журналисттерге сүйлөгөндө "Орусия саясий оюн менен алек болуп турганда карапайым адамдар жапа чегип жатат" деп айтты. Ак үй Москванын чечими “азык-түлүк коопсуздугун начарлатарын, миллиондогон адамдарга зыян келтирерин” билдирди.
Орусия Түркия жана БУУнун катышуусу менен бир жыл мурда түзүлгөн дан келишиминен чыкканын дүйшөмбүдө жарыялап, буга Москва койгон айрым талаптар аткарылбай жатканын жүйө келтирген.
Украинанын президенти Владимир Зеленский Киев Орусия келишимге катышпаган шартта да дан экспортун улантууга даяр экенин айтты.
Орусия Украинага согуш ачкандан бир нече ай өткөндөн кийин Кара деңиз аркылуу дан экспорттоо токтоп калган. Бул жагдай дүйнөдө азык-түлүктүн кымбатташына алып келген.
Киев менен Москва Түркия жана БУУнун ортомчулугу алдында дан экспортун кайра жандантуу келишимине былтыр 22-июлда Стамбулда кол коюшкан. Келишимдин мөөнөтү эки жолу узартылды. Андан бери Украинадан 30 миллион тонна буудай жана башка айыл чарба азыктары экспорттолду.
