Ысык-Көлдүн Ак-Суу районунда бешинчи класста окуган кыз сууга агып кетип каза болду. Ак-Суу райондук ички иштер бөлүмү кабарлагандай, кырсык 19-майда болгон. 11 жаштагы кыз сиңдиси менен чогуу ошол күнү кечке жуук, саат 17:40 чамасында мал тоскону үйүнөн чыккан.
"Эже-сиңдилер мал келгенче көчөдө ойношкон. Кыз жээкке барып, сууга түшүп кеткен, агыны катуу суу секелекти агызып кеткен. Кыздын сиңдиси үйүнө барып кабар берген",- деп жазылат маалыматта.
Милицияга ошол күнү кечинде Таш-Кыя айылынын тургуну сууда кыздын сөөгү жатканын көрүп, кабар берген. Секелектин сөөгү ал сууга кулаган жерден 600 метрдей төмөн тараптан, суу ташкыны жайлаган жерден табылган.
Иликтөө-тергөө иштери жүрүп жатат.
Өзгөчө кырдаалдар министрлиги күн ысып, суу киргенине байланыштуу жарандарды көлмөлөргө жана дарыяларга түшүүдөн карманууга жана бала-бакырасына да этият болууга чакырды.
Министрликтин маалыматына ылайык, Кыргызстанда былтыр бир жыл ичинде 85 адам сууга чөгүп каза болгон жана мындай кырсыктардын эң көбү жайкы сезондо Чүй, Ош жана Ысык-Көл облустарында катталган. Каза болгондордун 28и 12 жашка чейинки балдар.
Мекеме мындай кырсыктар айрыкча жайкысын сууга түшүү эрежелери, коопсуздук чаралары сакталбаган учурда көп катталарын, андыктан этият болуу зарыл экенин эскертүүдө.(ZKo)
