Кыргызстандык режиссер Ибадылла Ажибаевдин "Почтальон" тасмасы Германияда Grenzland-Filmtage эл аралык кинофестивалында "Мыкты даректүү фильм" номинациясын жеңип алды. Бул тууралуу фестивалдын сайтына жазылды, режиссер өзү да маалыматты "Азаттыкка" тастыктады.
Фестиваль 13-16-апрелде Зельб шаарында өттү. Ага дүйнөнүн булуң-бурчунан көркөм, даректүү, кыска метраждуу ондогон фильмдер сунушталат.
"Почтальон" тасмасында Баткен облусунун Лейлек районунда алыскы кыштактардын бириндеги почточунун эмгеги көрсөтүлгөн.
Дарыгер, психолог, режиссер, акын, сүрөтчү Ибадылла Ажибаев марттан бери Европадагы бир канча даректүү тасмалар фестивалына катышып жүрөт. Анын "Мугалим" фильми да буга чейин эл аралык сыйлыктарды уткан.
Grenzland-Filmtage эл аралык кинофестивалы 1977-жылдан бери уюштурулат.
