Кыргызстандык балбан кыз Айпери Медет кызы Казакстандын борбору Астана шаарында өтүп жаткан кыз-келиндер күрөшү боюнча Азия чемпионатында күмүш байгенин ээси болду.
Мелдештин расмий сайтындагы маалыматка таянсак, Медет кызы 11-апрелде 76 килограмм салмакта үч беттеш өткөрдү. Чейрек финалда индиялык Прия Прияны 4:0, жарым финалда жапониялык Мизуки Нагашиманы 3:2 эсебинде жеңди. Финалда казакстандык Элмира Сыздыковага жеңилип, 2-орунду ээледи.
Айпери Медет кызынын байгеси бул чемпионаттагы Кыргызстандын кыз-келиндер курама командасы үчүн экинчи байге. Буга чейин күрөштүн бул түрүнөн 59 килограмм салмакта Калмира Билимбек кызы коло байге алган. 68 килограмм салмакта Мээрим Жуманазарова 3-орун үчүн беттеште жаракат алгандыгына байланыштуу таймашты уланта алган жок.
Күрөштүн бул түрүнөн таймаштар 12-апрелде уланат. Анда Кыргызстандан Айсулуу Тыныбекова (62 кг), Бермет Нуридин кызы (57 кг), Нурзат Нуртаева (72 кг) жана Дилназ Сазанова (65 кг) килемге чыгышат. (ECh)
