Түркмөнстан Гурбангулы Бердымухамедовдун урматына курулуп жаткан шаарга 5 миллиард доллар коротот.
Бул тууралуу 29-мартта “Франция 24” телеканалы түркмөн аткаминерлерине таянып билдирди.
"Шаар куруунун биринчи айлампасында 3,3 млрд. доллар, экинчисинде дагы 1,5 млрд. доллар керек", - деди курулуш боюнча мамлекеттик комитеттин башчысы Дерягелди Оразов.
Дүйнөлүк банктын маалыматында Түркмөнстандын ички дүң өнүмү 45 млрд. долларга жетет. Аркадаг шаарынын курулушу республиканын жылдык кирешесинин 10% түзөт.
Ахал облусунун жаңы административдик борбору катары Аркадаг шаары курулары 2019-жылы белгилүү болгон. Түркмөн бийлиги 2020-жылы февралда курулушка 1,5 млрд. доллар сарпталарын айткан.
Аркадаг түркмөн тилинен которгондо "колдоочу" дегенди билдирет. Өлкөнүн мурдагы президенти, парламенттин жогорку палатасынын төрагасы Гурбангулы Бердымухамедов ушундай наамга ээ.
