Жапониянын эл аралык кызматташтык агенттиги (JICA) Баткенде табигый кырсыктарга туруштук бере турган жолдорду салуу үчүн грант катары 5,3 миллион АКШ долларын берет.
“Баткен облусунун жолдорун сала турган жабдууларды жакшыртуу” тууралуу макулдашууга 23-мартта кол коюлганын Кыргызстандын Финансы министрлигинин басма сөз кызматы билдирди.
Долбоордун дагы бир максаты Борбордук Азияда логистикалык коопсуздукту камсыз кылуу экени жазылган. Ишти Кыргызстандын Транспорт жана жолдор министрлиги аткарат.
Жапониянын JICA өнүктүрүү борбору Кыргызстанда 1993-жылдан бери иштеп келет. Агенттик айыл чарба, социалдык инфратүзүм, жакырчылык менен күрөшүү, социалдык жана агрардык өнүгүү, саламаттык сактоо, мыйзамдык системаны реформалоо өңдүү долбоорлорду ишке ашырып келет. (TAb)
