Баткенде ооруларды алдын алуу жана мамлекеттик санитардык-эпидемиологиялык көзөмөл боюнча район аралык борбордо ПЧР (ПЦР) лабораториясы пайдаланууга берилди. Ооруларды алдын алуу жана санитардык-эпидемиологиялык көзөмөл боюнча республикалык департаменттин маалыматына караганда, лабораториянын ачылышына 21-мартта облус жетекчилиги, жергиликтүү медицина мекемелеринин башчылары катышты.
Облустагы ооруканалар буга чейин коронавирусту аныктоо үчүн анализдерди Ош шаарына жөнөтүшчү. Эми жаңы ачылган лабораторияда COVID-19 илдетин аныктоого болот. Ал алдыңкы заманбап техника менен жабдылып, 2-4 саат ичинде 90дон ашык анализди изилдеп чыгуу мүмкүнчүлүгү бар экени, имарат 30 бөлмөдөн турары маалымдалды.
Ислам өнүктүрүү банкы каржылаган курулуш иштери 2021-жылы башталып, 2022-жылы аяктаган.
Кыргызстанда 2020-жылдын март айында башталып, былтыр басаңдаган коронавирус эпидемиясы 206 миңден ашуун адамга жукту, алардын 3 миңдейин сактап калуу мүмкүн болгон жок.
