Сасык тумоодон улам окуучулардын сабакка келбей жатканына байланыштуу Бишкекте сегиз мектеп 14-декабрдан тарта карантинге жабылып, онлайн окууга өтөт. Бул тууралуу 13-декабрда Бишкек мэриясынын басма сөз кызматы билдирди.
Маалыматка караганда, Бишкек шаарынын мамлекеттик санитардык-эпидемиологиялык көзөмөлдөө борбору Билим берүү башкармалыгы менен 13-декабрда 50 мектепте балдардын окууга келүүсүн текшерди.
Жыйынтыгында борбордогу №6, 60, 28, 54, 59, 72, 95, 103чү билим берүү мекмелеринде окуучулардын 20% мектепке келбей жатканы аныкталган. Эреже боюнча, эгер окуучулардын 20% сабакка барбай жатса мектептерде карантин киргизүү маселеси каралат.
Кыргызстанда соңку аптада сасык тумоого чалдыккандар дээрлик 1,5 эсе көбөйгөнүн Ооруларды алдын алуу жана санитардык-эпидемиологиялык көзөмөл департаменти кабарлаган. (BTo)
