Беларустун лидери Александр Лукашенко беларус учактары кайра жабдылганын, эми алар өзөктүк курал да алып жүрө алышарын айтты. Бул тууралуу ал Орусиянын президенти Владимир Путин менен 2022-жылдын июнь айынын аягында макулдашкан. Бирок анда сөз башка учактар тууралуу болгон.
“Путин экөөбүз буга чейин Санкт-Петербургда Беларустун Су-24 учагын да өзөктүк курал алып жүрүүгө ыңгайлаштырабыз деп айтканбыз. Бизди жөн гана сүйлөп койгон деп ойлойсуңарбы? Мына эми баары даяр болду”, - деди Лукашенко.
РБК басылмасы Су-24 Беларустун куралдуу күчтөрүнөн 2012-жылы эле алып салынганын жазды. Беларустун БелТА мамлекеттик агенттиги адегенде Александр Лукашенконун Су-24 учагы боюнча айтканын жазып, кийин аны өчүрүп койду.
Александр Лукашенко менен Владимир Путин эки ай мурда Санкт-Петербургда өткөн жолугушууда учактарды кайра жабдуу маселесин талкуулашкан. Кийин Беларустун лидери Су-35 учагын өзөктүк курал алып жүрүүгө ыңгайлаштырууга жардам берүүнү суранган. Владимир Путин ага макул болгон.
“Медуза” басылмасы бирок Су-35 буга чейин бир да жолу өзөктүк курал алып жүрүүдө колдонулбаганын тактады.
