Кызматтан убактылуу алынган саламаттык сактоо министри Алымкадыр Бейшеналиевдин кеңешчиси Мээрим Тилекованын бөгөт чарасы бүгүн, 15-июлда Каракол шаардык сотунда каралып, анын абактагы мөөнөтү 11-августка чейин узартылды. Бул тууралуу Тилекованын жактоочусу Кайсын Абакиров “Азаттыкка” билдирди.
Мээрим Тилекованын бөгөт чарасы 28-июнда Ысык-Көл облустук сотунда каралып, абакта калган. Жакындары анын ден соолугу начарлап кетти деген негизде үй камагына чыгарууну өтүнгөн. Ага чейин Каракол шаардык соту 15-июнда аны бир айга камоо тууралуу чечим чыгарган.
Тилекова Кылмыш-жаза кодексинин 343-беренесинин (опузалап пара алуу) негизинде кармалганын 17-майда Улуттук коопсуздук боюнча мамлекеттик комитеттин (УКМК) басма сөз кызматы ырастаган. Ага карата тергөө жүрүп жатканын маалымдаган.
12-майда Жети-Өгүздө медайымдардын кесиптик майрамына карата кафеде иш-чара өткөнүн, мурда орун басарынын катчысы болуп иштеп кеткен Тилекованы УКМК кызматкерлери ошол жерден кармап кетүүгө аракет кылганын, ага карата күч колдонуу коркунучу болгонун “Азаттыкка” министр Алымкадыр Бейшеналиев билдирген.
13-майда УКМК Ысык-Көл облусунун саламаттык сактоо боюнча координатору 100 500 сом пара алып жаткан жеринен кармалганын жарыялаган. Министр ал акчаны медайымдар кафеге чогултканын билдирген. (TSh)
