Кызматтан убактылуу алынган саламаттык сактоо министри Алымкадыр Бейшеналиевдин кеңешчиси Мээрим Тилекованын негизсиз камакта отурганын айткан жактоочусу Кайсын Абакиров Фейсбуктагы баракчасында соттун документтерин жарыялады.
Соттун бөгөт чарасы жөнүндө чыккан чечиминде Тилекованы айыптоо негиздемеси жазылган. Бирок Абакиров ал документте айтылгандар негизсиз, эч кандай кылмыштын курамы жок экенин "Азаттыкка" билдирди.
"Акчаны баары өз калоосу менен чогултуп, кафеде отурушкан. Анан ошол жерден кармап кетип жатпайбы. Ал кафенин акчасын дагы алып кетишкен. Кафенин ээлери акчабызды качан берет деп жазып жатышат. Эч кандай коррупция жок", - деди жактоочу.
Укук коргоо органдары адвокаттын билдирүүсү тууралуу комментарий бере элек.
Мээрим Тилекованын бөгөт чарасы 28-июнда Ысык-Көл облустук сотунда каралып, абакта калган. Жакындары анын ден соолугу начарлап кетти деген негизде үй камагына чыгарууну өтүнгөн.
Ага чейин Каракол шаардык соту 15-июнда аны бир айга камоо тууралуу чечим чыгарган.
Тилекова Кылмыш-жаза кодексинин 343-беренесинин (опузалап пара алуу) негизинде кармалганын 17-майда Улуттук коопсуздук боюнча мамлекеттик комитеттин (УКМК) басма сөз кызматы ырастаган. Ага карата тергөө жүрүп жатканын маалымдаган.
12-майда Жети-Өгүздө медайымдардын кесиптик майрамына карата кафеде иш-чара өткөнүн, мурда орун басарынын катчысы болуп иштеп кеткен Тилекованы УКМК кызматкерлери ошол жерден кармап кетүүгө аракет кылганын, ага карата күч колдонуу коркунучу болгонун “Азаттыкка” министр Алымкадыр Бейшеналиев билдирген.
13-майда УКМК Ысык-Көл облусунун саламаттык сактоо боюнча координатору 100 500 сом пара алып жаткан жеринен кармалганын жарыялаган. Министр ал акчаны медайымдар кафеге чогултканын билдирген. (TSh)
