Майлуу-Суу лампа заводу кайра өкмөттүн колуна өттү
Бул тууралуу Министрлер кабинетинин төрагасы Акылбек Жапаров парламентте билдирди.
"Токтоп турган ишканаларды сатып жибербей, ишке киргизүү саясатына өттүк. Бир мисал: Майлуу-Суу лампа заводун кыргыз мамлекети өзүнө кайтарып алды. Азыр мамлекеттик ишкана болуп калды. Бул завод – шаар түзүүчү (градообразующий) ишкана болот. Модернизацияга 1 млрд. сом карадык. Кара-Балта ремзаводу, Кара-Балта шаарындагы “Даназык” мамлекеттик ишканасы мамлекетке кайтарылды. Кара-Балта килем комбинатынын базасында синтетикалык жана жарым синтетикалык кездемелерди жана тигүү буюмдарын чыгаруу боюнча текстилдик кластерди ишке киргизүү боюнча иштер жүргүзүлүүдө.
Пахта-текстилдик кластерди түзүү боюнча маселе иштелип жатат. Анын базасында пахта тазалоочу заводду, жип чыгаруу фабрикасын, текстилдик фабриканы жана машина-трактор паркын, ошондой эле май чыгаруучу заводду уюштуруу пландалууда",-деди Жапаров.
Майлуу-Суу шаарындагы лампа заводу 1967-жылы ишке кирген. Кезинде 7-8 миңге чейин адам эмгектенген мекемеде, соңку кездери жумушчулардын саны жана өндүрүшү кыйла азайган.
Лампа заводу 2003-жылы жеке ишкерлерге сатылган. Ишкананын мамлекетке карызы көбөйгөндүктөн 2009-жылы банкрот деп жарыяланып, кийин "Майлуу-Суу лампа заводу" жоопкерчилиги чектелген коому болуп уюштурулган.
Бөлтүрүк Орусияга салынган санкциялар “Кумтөргө” таасирин тийгизип жатканын айтты
“Улуу көчмөндөр мурасы” улуттук холдингинин жетекчиси Тенгиз Бөлтүрүк Орусияга салынган санкциялар “Кумтөр” кенин иштетүүгө терс таасирин тийгизип жатканын билдирди. Бөлтүрүк парламентте маалымат берип жатып, логистика боюнча башка жолдор каралып жатканын маалымдады.
“Орусияга санкция киргенден бери, ачык айтканда логистика боюнча абдан кыйналып жатабыз. Биздин жолдорубуз Орусия аркылуу Европага кетчү. Ошондуктан азыр айла жок Иран менен иштеп жатабыз. Материалдын көбү Орусиядан келчү, ошондуктан альтернативдүү жолдорун башка мамлекеттен карап жатабыз”, - деди Тенгиз Бөлтүрүк.
Орусиянын Украинага басып киргенине байланыштуу АКШ, Европа баштаган өлкөлөр экономикалык санкцияларды күчөткөн.
Тенгиз Бөлтүрүк Кумтөр кениндеги карьердеги жарака жөнүндө дагы айтып, учурда иш жүрүп жатканын, июнь айына коюлган план толук аткарыларын белгиледи. Ал буга чейин быйыл Кумтөр кенинен 17,5 тонна алтын казып алуу планы коюлганын билдирген болчу.
Кыргызстан ККМ колдонууда ЕАЭБге мүчө өлкөлөрдүн ичинен эң артта
Өкмөт башкы Акылбек Жапаров Кыргызстанда көзөмөл-кассалык аппаратты (ККМ) колдонгондордун саны соңку учурда 2,4 эсеге көбөйгөнү менен Евразиялык экономикалык биримдикке (ЕАЭБ) мүчө башка мамлекеттерден ичинен кыйла артта калганын айтты.
"Биз ЕАЭБдин башка өлкөлөрүнөн дээрлик 4,5 эсе артта калуудабыз. Биз Салык кодексин демилгелеп жатканда, патент системасынан өтүүгө түрткү берүүчү ченем болгон. Биринчи жылы толугу менен бошотуу, жүгүртүүсү жылына 8 млн сомдон ашпаган субъекттерди бошотуу каралган. Эми, биз көрсөтүлгөн чектик суммага көтөрүүгө даярбыз. Бирок өзүңүздөр билгендей, салыксыз режимдин кандай чегине болбосун макул болбогон субъекттер да бар. Анын ордуна, алар патент ставкаларын 2 же 3 эсеге чейин же андан да ашык көтөрүүнү сунуштоодо. Алардын артында турган эң негизгиси, эсепке алуу жана ачык мамлекеттик көзөмөл болбошу керек. 1-июлда “Салык чек” лотореясы ойнотулат. Бүгүнкү күнгө 3,2 млрд сомдук чек сканерден өттү"-деди Министерлер кабинетинин төрагасы.
Министрлер кабинетинин төрагасы Акылбек Жапаров учурда өлкө боюнча 50 миң көзөмөл-кассалык машина колдонулуп жатканын айтты.
“2021-жылы 1-сентябрына карата республика боюнча 21 миң 191 ККМ же болбосо 306 адамга бир аппарат катталса, 2022-жылдын 27-июнга карата бардыгы 50 миң 307 ККМ же 134 адамга 1 аппарат катталды”, - деди Жапаров.
Ал ККМ аппарат көмүскө экономиканы кыскартуу үчүн зарыл экенин белгиледи.