Украинанын аймагындагы согушта каза тапкан орус аскерлеринин сөөгү жана жарадарлар Беларустун Гомел облусуна жеткирилип, андан ары поезддер жана учактар менен Орусияга жиберилип жатат. Бул тууралуу "Азаттык" радиосунун беларус кызматы жергиликтүү тургундарга жана медиктерге таянып жазып чыкты.
Бул маалыматты көз карандысыз булактар ырастай элек.
Гомел облусундагы ооруканаларда согуштан жаракат алган орус аскерлерин дарылоо улантылып жатканы айтылды. Андагы дарыгерлер жарадарларды Украинанын аймагынан аскердик автоунаалар жана тик учактар менен Наровляга чейин жеткиришкенин айтып беришкен. Андан ары аларды Мозырга жана Гомелге алып барып, дарылап жатканы кабарланды.
"Биз Мозырь ооруканасында жатып чыктык. Ал жерде жарадар болгон орус аскерлери абдан көп экен. Абдан коркунучтуу. Аябай оор майып болгондор бар. Алардын онтогон үнүн ооруканада чыдап угуу мүмкүн эмес", - деди атын атабаган булак "Азаттык" радиосунун беларус кызматына.
"Жекшембиде бир эле Мозырдагы ооруканада жүзгө чукул орусиялыктарга операция жасалды. Дүйшөмбүдө ооруканага андан да көп адамды алып келишти", - деп билдирди жергиликтүү дарыгер.
Дарыгерлер менен медайымдарга ооруканадагы абал тууралуу ачык айтууга тыюу салынган.
Ошол эле кезде Наровляда талаа госпиталы уюштурулганы маалым болду.
«Мурунку автобазанын аймагында көп аскердик чатырлар жайгашкан. Анын өзүнчө ашканасы жана кир жуучу жайы бар. Жарадарларды санап чыгуу кыйын, - деди "Азаттык" радиосунун беларус кызматына жергиликтүү тургундардын бири.
Дарыгерлердин бири Гомел жана Мозырь шаарларынын тургундарына пландуу жардам көрсөтүлүп жатканын билдирди.
"Эл дүрбөлөңгө түшүп жатат, бирок азырынча медициналык жардам өз убагында көрсөтүлүп, дары-дармектер жетиштүү. Мындан ары эмне болору белгисиз. Селеймеге каршы дары-дармектер боюнча маселе жаралат деп болжолдонууда", - дейт дарыгер.
Медициналык мекемедеги булак Гомел облусунун аймагынан 2500дөн ашык сөөк Орусияга поезд жана учактар менен алынып кеткенин айткан.
Беларустун Гомел облусу Украина менен чектешет.
