Орусиянын 24-февралдагы куралдуу басып кирүүсүнөн кийин өлкөсүн таштап кеткен украин жарандарынын саны 400 миңге жакындады. Мындай маалыматты БУУнун Качкындар боюнча жогорку комиссарлыгы билдирди.
Анда Украинанын бийлигинин 27-февралдагы маалыматына ылайык, өлкөсүн таштап кеткен жарандардын саны 368 миңден ашканы жана дагы өсүп жатканы айтылат.
Евробиримдиктин кризисти башкаруу боюнча комиссары Янез Ленарчич 27-февралда Орусиянын Украинага каршы согушу “жети миллиондон ашык адамды” жер которууга мажбурлашы мүмкүн деп билдирген.
Орусия 24-февралда Украинага чабуул жасап, басып кирди. Үч күндөн бери орус армиясы Украинанын бардык аймактарында аткылоосун жана бомбалоосун улантууда. Эң катуу чабуул Киевге жасалды.
