Украинанын Запорожье облусунда дүйшөмбүдө Орусиянын соккусунан эки киши каза таап, 15и жараат алды.
Бул тууралуу облустук аскердик администрациянын башчысы Иван Федоров Телеграм аркылуу билдирди.
Жергиликтүү бийлик соккуда 30дан ашык турак жайга зыян келтирилгенин маалымдады. Орусия тарап чабуул тууралуу комментарий бере элек.
Украинанын Коргоо министрлигинин Башкы чалгын башкармалыгы Орусияда аскердик учкуч Дмитрий Голенков «жок кылынганын» билдирип, ал ондогон украин жарандарынын өмүрү кыйылган чабуулдар үчүн жооптуу киши болгонун кабарлады.
Мекеменин маалыматына караганда, Орусиянын оор бомбалоочу авиациялык полкуна караштуу тобунун штаб башчысы Голенков 2022-жылы 27-июнда Кременчуг шаарындагы «Амстор» соода борборуна ракеталык сокку урганда имараттын ичинде миңге жакын киши бар болчу. Алардын 22си каза болуп, ондогон кишилер жараат алган. Ал эми 2023-жылы 14-январда Днепрде көп кабаттуу үйгө ракета менен чабуул коюлганда 46 кишинин өмүрү кыйылган, алардын алтоо бала болчу.
Голенковдун сөөгү балка менен башына урулган жарааттан каза болгон абалда табылганы айтылды.
Орусия 2022-жылдын июнундагы чабуул Кременчугдун чет жакасындагы курал-жарак кампасына урулганын, соода борбору бутага алынбаганын билдирген.
Москва 2022-жылы февралда Украинага каршы толук масштабдуу согуш ачкандан бери шаар-кыштактарынын мектеп, бала бакча, оорукана, таза суу жана энергетика тармагы сыяктуу жарандык инфраструктурасын талкалап, адамдарын өлтүрүп жатканы тууралуу айыптоолорду четке кагып келүүдө.
Украин бийлиги жана эл аралык уюмдар Орусиянын куралдын көптөгөн түрү менен жасалып жаткан соккуларын атайын чабуул катары баалоодо.
Орусия аннексиялап алган Крымда эки аптадан бери Казакстан жараны, 19 жаштагы Туран Устюгов камакта жатканын «Азаттыктын» казак кызматы билдирди. Орусиянын атайын кызматы аны «украин тарапта согушууну көздөгөн, Украинанын Куралдуу күчтөрүнүн ыктыярчылар батальонуна кирүүнү пландаган» деп айыптап жатат.
Орус бийлиги уулунан «кылмышка даярданган жана террордук топтун ишине катышууну көздөгөн» деп шек санап жатканын апасы Элмира Жанабаева билдирди. Айтымында, уулу чын эле Украинаны коргоо керектигин көп айтчу жана соңку кезде орусиялыктар менен да, украиналыктар менен да жазышып жүрчү.
Устюгов Крымдын Симферополь шаарына барганда кармалган. Орусиянын Федералдык коопсуздук кызматынын (ФСБ) кызматкерлери анын телефонунан Украинанын Орусияда тыюу салынган топторунуку деген анкеталарды табышкан.
Бирок ал анкеталар чындыгында эле украиналык топтордукубу же орус атайын кызматы ачкан жасалма сайттарбы, белгисиз.
«Азаттыктын» журналисттери Казакстандын Улуттук коопсуздук комитетинен маалымат сурап кайрылганда аталган мекеме Устюговго каршы «чет өлкөдөгү куралдуу жаңжалга катышуу» деген негизде кылмыш иши козголуп, тергөө жүрүп жатканын билдирди.
Орусия Украинага 2022-жылдын февралында кол салган. Ошондон бери, казак тараптын расмий маалыматына караганда, фронтко кеткен 10 казак жаранына иш козголгон.
Бирок чынында канча казакстандык кеткени, алардын канчасы кайтканы же каза болгону тууралуу маалымат жок
Орусияда туткунда каза болгон журналист Виктория Рощинанын сөөгү Украинага өткөрүлүп бериле элек. Бул тууралуу Украинанын согуш туткундарынын маселелери боюнча өкүлү Пётр Яценко билдирди.
Рощинанын атасына Орусиянын Коргоо министрлиги жөнөткөн катта ал 19-сентябрда көз жумганы, сөөгү туткун айырбаштоодо өткөрүлүп берилери айтылган. Эки өлкө ортосунда кезектеги туткун айырбаштоо жараяны 18-октябрда өттү. Бул тизмеге журналист эмне үчүн кирбей калганы белгисиз.
Рощина «Азаттыктын» украин кызматы менен да кызматташкан, согуш башталгандан бери анын жүрүшү тууралуу баяндап турган. Былтыр август айында Запорожье облусунун оккупацияланган аймагында орус аскерлеринин туткунуна түшкөн. Таганрогдогу абактан Москвага которуп жатышканда каза болгон. Өлүмүнүн себеби тууралуу так маалымат жок.
"Адам укуктары үчүн медиалык демилге" уюмунун өкүлү Татьяна Катриченко укук коргоочулардын маалыматына таянып билдиргендей, быйыл май айынан бери сентябрга чейин журналистти Таганрог шаарындагы №2 тергөө абагында жеке камерада кармашкан. Ошол изолятордо кармалып, кийин мекенине кайткан украиналыктар ал жактан кыйноого кабылганын айтып беришкен.
Украинада Рощинанын өлүмүнө байланыштуу кылмыш иши козголгон. Согуш мыйзамдарынын бузулушу жана атайылап адам өлтүрүү деген негизде козголгон ишти Башкы прокуратура тергеп жатат.
Украин бийлигинин маалыматына караганда, Орусияда 25 чакты украин журналисти туткунда кармалууда.