Бишкек шаарындагы көчөлөрдүн биринде аялын токмоктогон жаран жети күнгө камакка алынды. Аны шаардагы Ленин райондук соту Үй-бүлө кодексинин 70-беренеси (үй-бүлөдөгү зомбулук ) менен күнөөлүү деп тапты. Ошондой эле анын аялына милиция коргоо ордерин берди.
Шаардык ички иштер башкы башкармалыгынын билдиришинче, бул маалымат 30-январда түнкү саат 11лер чамасында түшкөн. Окуя болгон жерге барганда келин жолдошуна дооматы жок экенин айтып, ага каршы арыз жазуудан баш тартканы менен милиция бул окуяны териштирип-иликтеп жатканын билдирген.
Анын алдында социалдык тармактарда күйөсүнүн арачалагандарга баш бербей, аялы жыгылып калганына карабай башка-көзгө тепкилеп, сабап жатканы тартылган видео тараган.
Аялын, жанындагы өнөктөшүн коомдук жайларда, көчөдө сабаган учурлар буга чейин дагы катталган.
Расмий маалыматтарга ылайык, 2021-жылы үй-бүлөлүк зомбулукка байланыштуу 8,5 миңдей факт катталган жана бул мурдагы жылга салыштырмалуу 30% көп.
Башкы прокуратура 2012-жылдан 2015-жылга чейин жыл сайын 2500ден 3500ге чейин факты катталып турса, 2016-2018-жылдары ал 7000ден түшпөгөнүн маалымдаган. Мындан 90% ашык учурда аялдар жабыр тартат.
Үй-бүлөлүк зомбулук фактыларынын 90% ашыгы сотко жетпей түрдүү себептер менен кыскарып кетет.
