Орусияда ыр сынагынын жеңүүчүсү болгон кыргызстандык аткаруучу Александр Волкодав Кыргызстандын маданиятынын мыкты кызматкери болду. Наамдын төш белгисин жана өкмөттүн атынан 100 миң сомдук сертификатты 15-январда Бишкекте ырчыга маданият, маалымат, спорт жана жаштар саясаты министри Азамат Жаманкулов тапшырганын мекеменин басма сөз кызматы билдирди.
32 жаштагы Александр Волкодав 2021-жылдын 30-декабрында Орусиянын “Биринчи каналы” уюштурган "Голос" долбоорунун онунчу сезонунун жеңүүчүсү болгон. Финалда ал "Казачья" жана "Серенада трубадура" аттуу эки чыгарманы аткарган.
Президент Садыр Жапаров ырчыны “Фейсбуктагы” баракчасы аркылуу куттуктап, "Мекендешибиз сынактын бардык баскычтарын ийгиликтүү өтүп, мыктынын мыктысы экенин далилдеди. Александрдын жеңиши биз үчүн Жаңы жылдык эң сонун белек болду” деп айткан. (RK)
