2021-жылы Кыргызстанда миңден ашык ымыркайга Токиодогу Олимпиада оюндарында ийгилик жараткан спортчулардын ысымдары ыйгарылган. Бул тууралуу Санарип өнүктүрүү министрлиги билдирди.
2021-жылы төрөлгөн 414 уул балага Акжол, 374 кыз балага Мээрим, 324 кыз балага Айсулуу, 279 кыз балага Айпери деген ысым ыйгарылган.
Октябрь айында төрөлгөн үч эм кызга дагы ата-энеси балбан кыздардын атынан Айсулуу, Мээрим жана Айпери деген ысым беришти.
2021-жылы Токиодо өткөн Олимпиада оюндарында Акжол Махмудов менен Айсулуу Тыныбекова күмүш байге, Мээрим Жуманазарова коло байге уткан. Айпери Медет кызы Олимпиада оюндарында 5-орунду ээлеген.
Күрөш боюнча Ослодо өткөн дүйнө чемпионатында Айсулуу Тыныбекова менен Мээрим Жуманазарова дүйнө чемпиону аталып, Айпери Медет кызы коло байге уткан.
Буга чейин Санарип өнүктүрүү министрлиги 2021-жылы Кыргызстанда наристелерге эң көп коюлган ысымдарды жарыялаган.
Эркек балдарга эң көп коюлган 10 ысым:
- Мухаммад - 4537
- Умар - 4132
- Али - 2632
- Амир - 2164
- Билал - 2129
- Алихан - 2112
- Алинур - 2063
- Нурислам - 1910
- Эмир - 1681
- Усман - 1481.
Кыздарга эң көп коюлган 10 ысым:
- Салиха - 3107
- Раяна - 2864
- Амина - 2604
- Фатима - 2436
- Айлин - 2383
- Алия - 2040
- Сафия - 1968
- Аруузат - 1928
- Хадича - 1894
- Альфия - 1731.
2020-жылы балдарга эң көп коюлган ысым Умар, кыздардыкы Раяна болгон. (МТа)
