25 жылдан ашуун убактан бери англисче чыгып келе жаткан көз карандысыз Kyiv Post гезити кожоюну менен эмгек жамаатынын пикир келишпестигинен улам жабылганы айтылууда.
Басылманын ээси жана кыймылсыз мүлк менен иштеген ишкер Аднан Киван сайттын күтүүсүздөн жабылганы тууралуу 8-ноябрда маалымдап, бул "убактылуу" экенин билдирди.
"Качандыр бир кезде гезит кайрадан жакшы жана мыкты болуп чыгат",- деп жазды ал.
Бирок Kyiv Post гезитинин журналисттери билдирүү таратып, гезиттин жабылышына анын кожоюну "редакциялык саясатка аралашканы" себеп болгонун маалымдашты.
Маалыматка караганда, ишкер үч жума мурда ушул эле басылманын украин тилиндеги вариантын да чыгарууну көздөп, ага көзөмөл кылуучу редактор дайындаган. Муну редакция жамааты гезиттин көз карандысыздыгын чектөө аракети деп кабыл алышкан.
