28-ноябрда өтө турган парламенттик шайлоого катышуу үчүн жеке талапкерлер документ тапшыра баштады. Алгачкы арыз 13-сентябрда Борбордук шайлоо комиссиясынын (БШК) мурдагы төрагасы Акылбек Сариевден түштү. Ал Нарындагы №33 шайлоо округунан талапкер болууну көздөөдө. Бул тууралуу БШКнын басма сөз кызматы кабарлады.
Бир мандаттуу округдарга талапкерлердин документтери 18-октябрга чейин кабыл алынат.
Буга чейин 75 партия шайлоого катышуу ниетин билдирген. Шайлоо алдындагы үгүт 29-октябрда башталып, 27-ноябрда саат 8:00дө аяктайт.
Жогорку Кеңештеги 90 депутаттын 54ү партиялык тизме менен, 36сы бир мандаттуу округдардан шайланат. Партиялар үчүн жалпы өлкө бирдиктүү округ деп эсептелет, алар жалпы шайлоочулардын 5% ашыгынын добушун алыш керек.
БШК талапкер болуп катталган мамлекеттик жана муниципалдык саясий кызматтагылар ыйгарым укуктарын токтотушу керектигин эскертти.
2020-жылы Кыргызстанда парламенттик шайлоо өтүп, анын жыйынтыгы жокко чыгарылып, бийлик алмашкан. Октябрь окуялары учурунда Жогорку Кеңештин VI чакырылышы мөөнөтүн узарткан. (SE)
