Акжол - Олимпиаданын финалына чыккан кыргызстандык экинчи спортчу
Токиодо өтүп жаткан Олимпиада оюндарында грек-рим күрөшү боюнча 77 килограмм салмакта кыргызстандык Акжол Махмудов армениялык атаандашы Карапет Чальянды жарым финалда 6:2 эсебинде жеңип, финалга жолдомо алды.
Акжол - Олимпиаданын финалына чыккан экинчи спортчу
Токиодо өтүп жаткан Олимпиада оюндарында грек-рим күрөшү боюнча 77 килограмм салмакта кыргызстандык Акжол Махмудов армениялык атаандашы Карапет Чальянды жарым финалда 6:2 эсебинде жеңип, финалдык таймашка жолдомо алды.
Беттештин 1-айлампасында алгач бир упайды армян балбаны алды. Андан соң Махмудов катары менен упайларды алып, эсепти 6:1ге жеткирди. 2-айлампада армениялык бир упай алганга үлгүрүп, Махмудов артыкчылыгын бекемдеп андан ары эсепти өзгөртпөй сактап калды.
Махмудов буга чейин үч беттеш өткөргөн. Алгач тунистик Ламьед Маафини 11:0 эсеби менен уткан. Чейрек финалда азербайжандык Рафиг Хусейновду 9:1 эсеби менен жеңген. Алдыда алтын байге үчүн венгриялык Таман Лоринц менен күрөшөт. Финалдык таймаш 3-августта Бишкек убактысы боюнча саат 15:15те башталат.
Токиодогу Олимпиадада 3-августта күч сынаша турган кыргызстандык балбандар Айсулуу Тыныбекова менен Атабек Азизбековдун алгачкы атаандаштары аныкталды.
68 килограмм салмактагы Айсулуу Тыныбекова биринчи латвиялык Анастасия Григорьева менен беттешет. Тыныбекова бул атаандашы менен былтыр декабрда Сербияда өткөн Дүйнөлүк кубоктун финалында таймашып, 14:0 эсебинде утуп алган.
87 килограмм салмакта чыга турган кыргызстандык балбан Атабек Азизбеков венгриялык Виктор Лоринц менен күрөшөт.
Токиодо өтүп жаткан Олимп оюндарында кыргызстандык балбандар 1-августтан баштап күрөшө баштады.
Бүгүн, 2-августта 15:00дөн кийин эркин күрөш боюнча 68 килограмм салмакта Айпери Медет кызы коло медал үчүн күч сынашат.