Экс-президент Сооронбай Жээнбеков өткөн дем алыш күндөрү Кыргызстанга кайтып келди. Бул маалыматты 15-февралда "Азаттык" радиосунун өз булактары тастыкташты.
Жээнбеков жубайы менен Сауд Арабиясына умрага жөнөп кеткени 2-февралда белгилүү болгон.
Сауд Арабиясынын падышасынын чакыруусу боюнча уюштурулган бул сапар 2020-жылдын ноябрынан бери пландалганы, умра сапары 10 күн уланып, ал кайра Бишкекке кайтып келери айтылган.
Соңку күндөрү социалдык түйүндөрдө экс-президент күбө катары чакырылган сотко катышпоо максатында Кыргызстанга кайтпай калганы тууралуу маалыматтар тараган.
Ал мурдагы вице-премьер-министр Дүйшөнбек Зилалиевдин ишине байланыштуу Бишкек шаардык сотуна 3-февралга чакырылган.
2017-жылы алты жылдык мөөнөткө президент болуп шайланган Сооронбай Жээнбеков 2020-жылы парламенттик шайлоодон кийинки башаламандык учурунда кызматын тапшырып берген.(RK)
