Жалал-Абад облусунда ишкерлер тапкан киреше боюнча салык 70% ачыкталбай жатат. Бул тууралуу өкмөттүн Жалал-Абаддагы өкүлү Абсаттар Сыргабаев 10-февралда өткөн облустук жыйында айтты.
Жыйында белгилүү болгондой, облуста өндүрүлбөй калган салык төлөмдөрүнүн суммасы 2021-жылдын 1-январына карата 381 миллион сомду түзүп, өткөн жылга салыштырганда 140 миллион сомго көбөйдү.
Район-шаарлардын ичинен өнө элек эң көп карыз Ноокенде 40 миллион сом болсо, Жалал-Абад шаарында 68 миллион сомго жеткен.
Облус башчысы ишкерлерди мыйзам жолуна түшүүгө чакырып, салыктарды жашырбоо керектигин айтты:
"Салык кызматы ошолор берген отчетуна эле макул болуп, ишкерлер менен бир болуп жатасыңар. Салыктын 30% эле көрсөтүлүп, 70% сол жакка кетип жатат".
Кыргызстан «Transparency International» уюмунун жемкорлук боюнча тизмесинде 2020-жылдын жыйынтыгы менен 180 өлкөнүн ичинен 124-орунду ээледи.
Мамлекеттик салык кызматы быйылкы жылга карата планын көбөйтүп, мамлекеттик бюджетке 96 миллиард сом каражат чогултуу милдетин койгон. (TB)
