Жогорку Кеңештин имаратынын жетинчи кабатына беш депутат көчтү. Бул тууралуу "Азаттыкка" парламенттин иш башкармалыгынын башчысы Маратбек Матазимов кабарлады.
Матазимовдун айтымында, 7-кабатка көчүү тууралуу сунушун алар бардык депутаттарга айтып көрүшкөн. Натыйжада буга чейин иш бөлмөсү төмөнкү кабаттарда жайгашкан депутаттар Бакыт Төрөбаев, Өмүрбек Бакиров, Камчыбек Жолдошбаев, Бактыбек Турускулов жана мурдагы төрага Дастанбек Жумабеков жетинчи кабаттан орун алышты.
Депутат Дастанбек Жумабековдун айтымында, кабинеттерди кайра калыбына келтирүүгө алар бир нече айлык маянасын беришкен:
"Үч айлык маянабызды жана депутаттык фонддогу акчаны бөлдүк. Дубалдар кайра бойолду. Айрым керектүү эмерек алынды".
2020-жылдын 5-6-октябрындагы окуяларга чейин жетинчи кабатта президенттин иш башкармалыгы жана парламент төрагасы отурчу. Октябрдагы башаламандыктан соң Ак үй талкаланган.
10-январда мөөнөтүнөн мурда президенттик шайлоодо жеңип чыккан президент Садыр Жапаровдун администрациясы толугу менен Өкмөт үйүнө көчкөн. (BCh)
