Жогорку Кеңештин мурдагы депутаты Карганбек Самаковго карата чыккан Жогорку соттун өкүмү жокко чыгарылды. Бул тууралуу аталган бийлик органынын басма сөз кызматы 10-февралда кабарлады.
Самаковго карата козголгон кылмыш иши Бишкек шаарынын Октябрь райондук сотуна кайра кароо үчүн жиберилди.
Карганбек Самаковго Чүй облусунун Аламүдүн районундагы Байтик, Лебединовка, Кара-Жыгач айыл аймактарында 262 гектар жерди мыйзамсыз трансформациялоо боюнча кылмыш иши мындан 4 жыл мурда ачылган болчу.
Октябрь райондук сотунун судьясы Дамирбек Назаров «Жер тилкесин мыйзамсыз трансформациялаган» деп айыптоонун негизинде мурдагы депутатты 10 жыл эркинен ажыратып, мүлкүн конфискациялоо тууралуу өкүмдү 2017-18-жылдары чыгарган эле.
Жогорку соттун 3-февралдагы токтомуна ылайык эми Октябрь райондук соту 2017-жылдын 19-декабрында жана 2018-жылдын 1-июнунда чыгарган өкүмдөрү жокко чыгарылып, иш кайра кароого жиберилди. (BCh)
