Ушул тапта премьер-министрдин милдетин биринчи вице-премьер-министр Артем Новиков аткарууда. Президент Садыр Жапаров мөөнөтүнөн мурда өткөн 10-январдагы президенттик шайлоонун алдында өкмөт башчылык кызматты убактылуу токтоткон. Шайлоонун расмий жыйынтыгы чыккандан кийин 21-январда премьер-министрлик кызматты тапшырып, азыр иштеп жаткан өкмөт кызматтан кеткен.
Новиков башында турган аткаруу бийлиги өкмөттүн жаңы курамы түзүлгөнгө чейин иштеп турат.
Жогорку Кеңештеги көпчүлүк коалицияны КСДП, «Республика - Ата Журт», «Кыргызстан» жана «Бир Бол» фракциялары түзөт. «Өнүгүү-Прогресс» менен «Ата Мекен» оппозициялык азчылыкта.
Көпчүлүк коалиция премьер-министрдин талапкерлигин, өкмөттүн жаңы курамын жактыргандан кийин ал парламенттин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинде каралат. Андан соң Жогорку Кеңештин жалпы жыйынына чыгарылат.
Жогорку Кеңештеги көпчүлүк коалиция 1-февралдагы жыйынында премьер-министрлик кызматка Улукбек Мариповдун талапкерлигин карап жатат.
Азыр Улукбек Марипов өзүнүн пландары тууралуу депутаттарга маалымат берип, суроолорго жооп берүүдө.
41 жаштагы Улукбек Марипов 2016-жылдын 19-мартынан ушул мезгилге чейин Эсептөө палатасын жетектеп келе жаткан.