Жогорку Кеңештин депутаты Иса Өмүркулов өкмөттүн сунушталып жаткан жаңы курамы тең салмакталган деп эсептейт. Мындай пикирин ал бүгүн, 3-февралда парламентте өкмөттүн жаңы курамы, түзүмү жана программасы талкууланып жатканда айтып, премьер-министрликке талапкер Улукбек Мариповду айрым күмөн санаган депутаттарды укпоого чакырды:
«Радикалдуу түзүмдүк өзгөртүүгө бардыңыз. Эми артка кайтпаңыз. Депутаттардын күмөн же кооптуу деген суроолорунун баарын четке кагыш керек. Жасайбыз деш керек. Жоопкерчиликти алдыңар да, мойнуңарга. Ал эми курам тең салмакталган. Мындай курам келген эмес. Жаш болсо да тажрыйбалуулар бар. Айымдарды колдоого алалы».
Камчыбек Ташиев: УКМК уюшкан топторго каршы күрөшпөшү керек деп жатышпайбы. Андай эмес. Эгер биз мага тийбе, сага тийбе деп жашай берсек жашообуз өзгөрбөйт.
УКМКнын АКСи коррупция боюнча 2020-жылдын 10 айында 116 млн. сомду бюджетке кайтарды, мен келгенден кийин, ноябрь декабрда 2 млрд. 800 млн. сомду, январда 1,5 сомду ордуна койду. Эми коррупционерлер, кримтөбөлдөр болбойт.
Камчыбек Ташиев: Уурдаган акчасын мамлекетке кайтарса, тергөө менен кызматташты деп кое беребиз. Коррупция менен күрөшүү акча жүзүндө эле жүрбөйт экен да. Мамлекетибизде уюшкан кылмыштуу топтор кайсы адам кайсы кызматка барышы керек экенин ошолор чечип калды. Мындан ары биздин мамлекетте кримтөбөл деген болбошу керек. Ошону ишке ашырышыбыз керек.
Депутат Дастан Бекешев жаңы сунушталып жаткан өкмөт башчыга 5600 сомго жашай аласызбы деген суроо берди.
Ага Улукбек Марипов жашаса болот, бирок кыйын деди.