Кыз-келиндер күрөшүнөн Айсулуудан сырткары Айпери Медет кызы, Мээрим Жуманазарова жана Нураида Анаркулова да мелдешке катышты. 68 килограммга чейинки салмакта килемге чыккан Мээрим Жуманазарова мелдештин финалына чыкса, 76 килограммга чейинки салмакта Айпери Медет кызы коло байге үчүн күрөшөт. Ал эми Нураида Анаркулова атаандашына жеңилип мелдештен четтеди. "Азаттык" Кыргызстандын намысын талашып жаткан балбан кыздардын сүрөтүн топтоду.
Дүйнө кубогунда намыс талашкан кыргыз кыздары
Айсулуу Тыныбекова кыз-келиндер күрөшү боюнча Сербиянын Белград шаарында өтүп жаткан Дүйнө кубогунда алтын медаль тагынды. 62 килограммга чейинки балбандар арасындагы финалдык кармашта Тыныбекова латвиялык Анастасия Григорьеваны 14:0 эсебинде жеңди.
1
Балбан Айсулуу Тыныбекова 14-декабрда кыз-келиндер арасында 62 килограммга чейинки салмакта килемге чыкты.
2
Тыныбекова финалга чейин үч атаандашын - алгач румыниялык Крисца Тунде Инцени, чейрек финалда түрк балбаны Кансу Аксойду, жарым финалда Любовь Овчарованы жеңди.
3
Айсулуу Тыныбекова менен латвиялык балбан Анастасия Григорьеванын Дүйнө кубогунун финалдык беттешинде күрөшүп жаткан учуру.
4
Айсулуу финалда мыкты күрөштү. Беттеш башталгандан тартып эле ыкма жасап, упай артынан упай алып жатты.
5
Айсулуу Тыныбекова менен Анастасия Григорьева.
6
Финалдык беттештин бүтөөрүнө бир нече секунда калганда Айсулуу Тыныбекова атаандашы Анастасия Григорьеваны жерден дээрлик толук көтөрүп, далысы менен жерге чапты. Бул ыкмасы үчүн беш упай берилди.
7
Жыйынтыгында 14:0 эсеби менен Айсулуу Тыныбекова Дүйнө кубогунда ишенимдүү жеңишке жетип, алтын медалдын ээси болду.
8
Сүрөттө: Анастасия Григорьева Айсулуудан жеңилип калганына ыза болуп жатат.
9
Айсулуу бул Дүйнө кубогунда төрт жолу беттеш өткөрүп, төрт атаандашын тең ири (10:0, 10:0, 13:2, 14:0) эсеп менен утту. Алгач румыниялык Крисца Тунде Инцени (10:0), чейрек финалда түркиялык Кансу Аксойду (10:0) уткан. Жарым финалдык беттеште орусиялык Любовь Овчарованы 13:2 эсебинде жеңген.
10
Айсулуу Тыныбекова Дүйнө кубогунун алтын медалын тагынып турган учуру.
11
Балбан Мээрим Жуманазарова 15-декабрда күрөшкө түшүп, эки атаандашын утуп, финалга чыкты.
12
Мээрим Жуманазарова жарым финалда украиналык Алина Бережнаны утуп алды. Эми ал финалда чехиялык Адэла Ханзликова менен күч сынашат.
13
76 килограммга чейинки салмакта күрөшкөн Айпери Медет кызы Дүйнө кубогунун коло байгеси үчүн күрөшөт.
14
Айпери Медет кызы жарым финалда германиялык балбан Аллин Роттер Фокенге жеңилди.
15
Дүйнө кубогу Сербиянын борбору Белград шаарында өтүп жатат. Мелдеш 12-декабрда башталып, алгачкы эки күндө грек-рим күрөшүнөн балбандар күч сынашты.
Буга чейин кыргызстандык грек-рим күрөшчү Жоламан Шаршенбеков Дүйнө кубогунун алтын медалын утуп алган. Күрөштүн ушул эле түрүнөн 13-декабрда Руслан Царев (72 кг.) менен Калы Сулайманов (63 кг.) мелдештин коло медалын тагынышты.
