Майдын аягында АКШда Жорж Флойд аттуу афроамерикалык полиция аны кармоо учурунда каза тапкандан кийин өлкөдө полициянын зомбулугу, расалык, социалдык теңсиздикке каршы ондогон шаарларда нааразылык акциялары өтүп, айрымдары кагылышуу, талап тоноо менен коштолду. Ушундай эле коомдогу теңсиздик менен полициянын зулум аракеттерине каршы башка бир катар мамлекеттерде да демонстрациялар өтүп, илгерки тарыхый эстеликтер кулатылды.
Ушул глобалдык каршылык кыймылын АКШнын Бостон шаарындагы Түндүк-Чыгыш университетинин профессору, Жогорку Кеңештин мурдагы депутаты жана дипломат Бакыт Бешимов жана он жылдай мурда "Азаттык" радиосунда иштеп калган журналист, АКШнын Миннеаполис шаарында жашаган ишкер Илим Жанузаков менен талкууладык.