Камактагы саясатчы Равшан Жээнбеков пикирлештерин биригип, кеңири коалиция курууга чакырды.
30-декабрда ал кайрылуу жолдоп, “Демократтар азчылык болгондуктан биз да биригүүбүз, кеңири коалиция куруубуз зарыл” деди.
Саясатчынын пикиринде, 2020-жылдагы парламенттик шайлоо алдында бийлик “олигархиялык жана жалган демократиялык партиялардан турган ыңгайлуу парламентти куроого далбас урат”.
Ошондуктан, Жээнбеков белгилегендей, “демократтар парламенттик шайлоого таасир көрсөтө алышы үчүн мурда-кийинки жеке таарынычтарды жана талаптарды четке сүрө туруганы туура болот”.
Равшан Жээнбековду 12-декабрда Ички иштер министрлиги (ИИМ) кармаган. Ага Жазык кодексинин 244-беренеси («Барымтага алуу») жана 264-беренеси («Массалык башаламандык уюштуруу») боюнча айып коюлган. 14-декабрда буга дагы бир берене 309-берене (“Бийликти күч менен басып алуу”) кошулганы кабарланды.
Ал 7-8-августта мурдагы президент Алмазбек Атамбаевди кармоо маалында Кой-Таш айылында болгону үчүн буга чейин да ИИМге суракка чакыртылган.
Жээнбековдун тарапкерлери Жээнбеков Кой-Ташта мыйзам бузбай, арачы болуп жүргөнүн белгилеп жатышат.
26-декабрда Бишкек шаардык соту Биринчи май райондук сотунун чечимин өзгөртпөй, Жээнбековду 9-февралга чейин камакта калтырды. (RK)
