Сириядагы жихадчыл күчтөрдүн акыркы таянычына чабуул коюла баштагандан бери бул аймактан качып чыккан адамдардын катары калыңдады. Алардын басымдуу бөлүгүн аялдар менен балдар түзсө да араларында эркектер жок эмес.
"Франс пресс" агенттигинин кабарчылары маалымдагандай, качкындар арасында балдарын жетелеген украиналык жана орусиялык аялдар да бар.
"Сириянын демократиялык күчтөрүнүн" басма сөз өкүлү Мустафа Балинин билдиришинче, бир күндө эле согушкерлер көзөмөлдөгөн аймактан 600 тургун качып чыкты.
Баш кеңсеси Британияда жайгашкан Адам укуктары боюнча Сирия обсерваториясы соңку бир суткада дагы 350 киши жихадчылардын чордонунан качууга үлгүргөнүн маалымдады.
Андай качкындардын бири атын атабаган ирактык аял кырдаалды мындай сүрөттөдү:
- Абадан бомбалоо болуп жатты. Жыйырма күн боюнча буюм-тайымдарыбызды жыйнап алып, автоунаага түшүп чыгып кетүүгө аракет кылдык. Алар бизге уруксат бербей жатышты. Акыры жөө-жалаңдап качып чыктык. Баса албаган карыялар калышты.
Өткөн аптада АКШнын президенти Дональд Трамп Сириядагы "Ислам мамлекети" террордук тобу көзөмөлдөп келген акыркы аймактар бошотуларына аз калганын билдирген.
Андан көп өтпөй, 9-февралда Кошмо Штаттар колдоо көрсөткөн, басымдуу бөлүгүн күрт жана араб жоокерлери түзгөн "Сириянын демократиялык күчтөрү" экстремисттик тобунун акыркы чордону деп мүнөздөлгөн Сириянын чыгышындагы Багхуз кыштагына чабуулун баштаган.
Күрт күчтөрүнүн божомолу боюнча бул айылда 2-3 миңге чейинки жайкын тургун жана 600дөй согушкер болушу мүмкүн.
- Бул кармаш жакынкы арада аяктайт. Багхуздагы террорчулардын басымдуу бөлүгү чет өлкөлүктөр. Акыркы эки айда багынып бергендердин же камакка алынгандардын көбү чет мамлекеттин жарандары, - деп билдирди "Сириянын демократиялык күчтөрүнүн" басма сөз өкүлү Мустафа Бали.
Багхуз кыштагы Сириянын мунайга бай Дейр-эз-Зор провинциясында жайгашкан. "Сириянын демократиялык күчтөрү" "Ислам мамлекети" террордук тобун бул провинциядан сүрүп чыгаруу үчүн чабуулдарын сентябрь айында баштаган. Андан бери миңден ашык күрт жана араб жоокерлери, 650дөй жихадчы жана 400дөн ашуун жайкын тургун мерт болду.
Адам укуктары боюнча Сирия обсерваториясынын маалыматы боюнча, соңку эки айда 37 миңдей адам экстремисттик топтун чордонунан күрт күчтөрү көзөмөлдөгөн аймактарга жер которгон. Алардын көбүн "Ислам мамлекети" тобунун согушкерлеринин аялдары жана балдары түзөт. Декабрь айынан бери "Сириянын демократиялык күчтөрү" 3400дөй согушкерди камакка алган.
Жихадчыл күчтөр Сириянын акыркы таянычынан сүрүлүп чыгарылгандан кийин АКШ күрт жана араб күчтөрүнө көмөк көрсөтүп жүргөн 2 миңдей аскерин Сириядан чыгарат деп күтүлүүдө.
