Мамлекет башчы Сооронбай Жээнбеков 2019-жылы июлда кол койгон жарлыкка ылайык, "9-сентябрь - Кыргызстанда Комуз күнү" - деп белгиленген. Бул күндү утурлай башка облустарда дагы иш-чаралар уюштурулду. Оштогу Алымбек Датка этнографиялык комплексинде 500 комузчу "Маш ботой" күүсүн чертишти. Өлкөдө соңку жылдары улуттук аспапта ойногон жаштар көбөйгөнү айтылууда. "Азаттык" бул күнгө карата комуз чапкан уста Орозбек Пазылов тууралуу сюжети кайрадан жарыялоону чечти. Ал 2002-жылы Лейлектен Бишкекке көчүп келген. Шаар четиндеги жаңы конуштардын биринде эки бөлмөлүү батирде жашайт. Жыгач уста азыр өзү сүйгөн комузду өрүк, жаңгак, кара жыгачтан чаап, сатып жаткан убагы. Базарга өзү жасаган эмгегин алып баратып сапарлаштарына ырдап берет.