"Сөз эркиндиги ыйлай турган абалга жетти"
12-ноябрда Бишкек шаарындагы жыйында Кыргызстандагы сөз эркиндигинин абалы, пикир айтуу укугуна байланыштуу соңку жагдайлар талкууланды. Чогулгандар массалык маалымат каражаттарына, журналисттерге жана укук коргоочуларга карата соттук доолорду айыпташты. Иш-чарага депутаттар, коомдук ишмерлер, эл аралык жана жергиликтүү бейөкмөт уюмдардын өкүлдөрү, укук коргоочулар, эксперттер катышты. “Чек арасыз кабарчылар” эл аралык уюму 2017-жылдагы сөз эркиндиги боюнча рейтингде Кыргызстанды 85-позициядан 89-позицияга жылдырып, сөз эркиндигинин абалы начарлаганын белгилеген. Мунун себебин эл аралык уюм өткөн жылы Кыргызстанда медиа каражаттарына карата соттук доолор көбөйгөнү менен байланыштырган.
