Орусиянын Санкт-Петербург шаарындагы быйыл апрелде болгон терактты уюштурду деп айыпталган ага-ини Азимовдордун атасы Ахрал Азимов Москва шаарында камакка алынды. Бул тууралуу «Азаттыкка» Ахрал Азимовдун кичи уулу Билол Азимов билдирди.
Анын айтымында, атасын Москва шаарынын полициясы кармаган. Кармалган себеби азырынча ага белгисиз.
Билол Азимовдун өз пикиринде, атасы ФСБ кызматтары тарабынан Аброр жана Акрам Азимовдор мыйзамсыз камакка алынганын, алар күнөөсүз экенин айтып жүргөнү үчүн камакка алынышы мүмкүн.
Орусиянын күч кызматтары азырынча Ахрор Азимовдун кармалышы боюнча расмий билдирүү тарата элек.
Санкт-Петербургдун метросунда 3-апрелде болгон жардыруудан 15 киши мерт болуп, жарадарлардын саны элүүгө жеткен. Бир да террордук уюм бул калаба үчүн жоопкерчиликти өз мойнуна алган эмес. Тергөөнүн маалыматына ылайык, терактты Кыргызстанда туулган, Орусиянын жараны, 22 жаштагы жанкечти Акбаржон Жалилов уюштурган. Ал эми аны уюштурууга катышы бар киши катары Акбар жана Аброр Азимовдор камакка алынган. Кыргызстанда туулуп, кийин Орусиянын жарандыгын алышкан бул ага-инилер өздөрүнө коюлган айыптарды четке кагып жатышат.
Камакка алынган Аброр Азимов кийин Орусиянын Федералдык коопсуздук кызматынын «жашыруун абагында» кыйноого кабылганын билдирип чыккан. Бул боюнча анын адвокаты адвокаты Ольга Динзе Орусиянын Башкы прокуратурасына кат жөнөткөн. (ErN)
