7-октябрь күнү жол кырсыгынан вице-премьер-министр Темир Жумакадыров каза болду.
Маркумду акыркы сапарга узатуу зыйнаты бүгүн Бишкектеги Токтоболот Абдымомунов атындагы Кыргыз улуттук драма театрында өтүп жатат. Сөөгү Ала-Арча көрүстөнүнө коюлат.
Маркум вице-премьер-министр, Республикалык шайлоо штабынын башчысы, 38 жаштагы Темир Жумакадыров менен кошо 30 жаштагы жардамчысы Нурлан Жамгырчиев жана 33 жаштагы айдоочусу Нурбек Муканов 7-октябрь күнү жол кырсыгынан каза тапты.
Ички иштер министрлигинин маалыматына караганда, вице-премьер-министр бараткан «Тойота Лэндкрузер» автоунаасы бүгүн таңкы саат 7:30да Бишкек-Чалдовар жолунун 36-чакырымында, Москва районунун Садовое айылында “КамАЗ” менен сүзүшкөн.
