Президенттин 7-апрелди майрам күндөрдүн тизмесине киргизүү сунушун парламент колдоду. Ошол эле президенттин жарлыгында 17-мартты Аксы окуясын эскерүү күнү, 24-мартты элдик ыңкылапты эскерүү күнү катары белгилөө сунушу берилген. Ыңкылап күндөрү саналган 24-мартка жана 7-апрелге эки башка макам ыйгаруу демилгесин коомчулук кандай кабылдайт? Кан төгүү менен коштолгон 7-апрель ыңкылабына укуктук жактан туура баа берилип жатабы? Алты жылдан кийин апрель ыңкылабы максаттарына жетип жатат деп айтуу канчалык орундуу? "Азаттыктын" “Ыңгайсыз суроолор” телепрограммасынын бул жолку чыгарылышында ушул жана башка суроолорго жооп издедик. Талкууга мамлекеттик жана коомдук ишмер Эмилбек Каптагаев жана журналист Нарын Айып катышты.