“Золотые пески” пансионатын Кыргызстандын менчигине алуу тууралуу маселени Ташкенттеги Чкалов атындагы авиациялык өнөр жай бирикмеси чечет деп билдирди “Азаттыкка” атын атагысы келбеген өзбек тараптын өкүлү.
- 1972-жылы “Золотые пески” пансионаты аталган заводдун акчасына курулган, азыр ал заводго акционердик коом ээлик кылат. Ошондуктан бул маселени акционерлер карап, чара көрүшөт деп ойлойм, - деди ал.
Ал эми Кыргызстандын экономика министри Арзыбек Кожошев 1992-жылкы КМШ мамлекеттеринин ортосундагы келишим боюнча буга чейин Өзбекстан пайдаланып келген төрт пансионатты Кыргызстанга алуу мыйзамдуу деп билдирди. Анын айтуусунда, 1970-1980-жылдары курулган бул пансионаттар СССРдин акчасына салынган. Ошондуктан Кыргызстан аларга толук ээлик кыла алат.
Премьер-министр Темир Сариев 4-апрель күнү Ысык-Көл жээгиндеги Өзбекстан пайдаланып келген төрт пансионат толугу менен Кыргызстандын мамлекеттик менчигине өткөрүлөрү тууралуу токтомго кол койгон. (ZKo)
