Чаркпалек - суу сузгучтары бар дөңгөлөк. Ал арык же каналдан, өстөндөн, болбосо өзөндөн дөңсөө жерге суу чыгарат. Чаркпалекте суу сузуп алчу сузгуч же калак катары дөңгөлөктүн четине орнотулган калай челек, чоң темир чөмүч кызмат кылат. Мына ушул идиштен суу ноого тынбай агып турат. Кыргызстандын түштүгүндө акыркы төрт-беш жылда чаркпалектин жаңы түрү пайда болду. Ал сууну дөңгөлөктүн ичине кылдат оролгон шлангга топтоп, андан ары түтүккө катуу басым астында берет. Кара-Кыштак - Кызыл-Кыя өстөнүндө ушундай бир нече чаркпалек бар.