Эгерде президентти жана Жогорку Кеңеш депутаттарын шайлоо жөнүндөгү мыйзамга киргизилип жаткан өзгөртүүлөрдү Жогорку Кеңеш колдосо, келерки парламенттик шайлоодо өлкө боюнча бирдиктүү шайлоо округу түзүлүп, ал 9 регионалдык округдарга бөлүнөт. Демилгечилер бул мыйзам жаңы саясий элитаны түптөй турганын, аймактык лидерлерге саясатка жол ачыларын айтса, ал аймактык бөлүнүп-жарылууну күчөтөт деп сындагандар да бар. Бул ирет “Ыңгайсыз суроолорго” мыйзамдын башкы демилгечиси, “Ата-Мекен” фракциясынын лидери Өмүрбек Текебаев, Жогорку Кеңеш депутаты Нарынбек Молдобаев жана коомдук ишмер Эдил Байсалов катышты.