Бүгүн Жалал-Абад облусунда аза күтүү күнү. Облустун калкы 14-майда болгон кандуу тополоңдон кийин эсине келүүдө. Контрреволюциялык күчтөр уюштурган тополоңдо эки адам окко учуп каза болуп, алтымыштай адам ар кандай жаракаттарды алды. Убактылуу өкмөттүн төрайымы Роза Отунбаева курман болгондордун жакындарына көңүл айтты.
15-майда Жалал-Абад облусунда абал тынч болду. Губернатордун милдетин аткаруучу Бектур Асанов кечээки окуяларды мурдагы президент К. Бакиевдин инилери башында турган күчтөр уюштурган деп эсептейт.
Акыркы эки күндөн бери өлкө түштүгүндө опуртал абал түзүлүп, үч облустун акимчилигин мурдагы бийликтин тарапкерлери ээлеп алышты. 14-майда түштүктөгү кырдаал толук убактылуу бийликтин көзөмөлүнө өттү. Бирок Жалал-Абаддагы кагылышта бир адам каза таап, дагы бир канча киши жаракат алды.
3-майда Жалал-Абадда кайрадан нааразылык акциялары өттү. Иш орундары жабылганына нааразы ишкерлер бүгүн Жалал-Абад шаар мэриясынын алдына келишти. Буга дейре губернатордун 1-орунбасарынын милдетин аткарып келген Кадырбек Бечеловдун тарапкерлери аны губернаторлукка шайлоону талап кылышты.
Убактылуу өкмөт дайындаган губернатор Бектур Асанов Жалал-Абад шаары менен Сузак районунда абал опурталдуу экенин билдирди. Анын айтымында аталган жайларда деструктивдүү күчтөр элге тынчтык бербей жатат.
Жалал-Абад облусунда абал курч бойдон калууда. 17-апрелде түштөн кийин К. Бакиевдин жактоочулары облбийликтин имаратын ээлеп алышып, кечинде кайра чыгып кетишти. Бул күнү облустук телекомпаниянын имаратын да басып алууга аракет жасалды.
Жалал-Абад облусунда кырдаал областтык бийликтин көзөмөлүндө. 7- апрелдеги Ак үй алдындагы кан төгүүгө К. Бакиевдин бийлиги көбүрөөк жооптуу. Базар-Коргон районундагы элдик курултайда облустун губернаторлугуна шайланган Бектур Асанов “Азаттыкка” жогоркудай ой-пикирлерин бөлүштү.
Бүгүн Жалал-Абад шаарында башталып, Базар-Коргон районунда улантылган Элдик курултай губернаторлукка буга дейре Кыргызстандын Пакистандагы элчиси болуп турган Бектур Асановду шайлады.
Жалал-Абадда президент К. Бакиевдин колдоочулары 13-апрелде митинг өткөрүп, Бишкекте болгон кан төгүүлөр үчүн оппозицияны сындап чыгышты. Митингге К.Бакиев да катышып, Ак үй алдында болгон окуяны эл аралык комиссия иликтеп, айыбын далилдесе, эл алдында жоопкерчилик тартууга даяр экенин билдирди.
Президент Курманбек Бакиев бүгүн Жалал-Абадда жүргөн БУУнун атайын өкүлү Ян Кубиш менен жолугушуп Кыргызстанга БУУнун тынчтык күчтөрүн киргизүүнү жана эл аралык комиссия түзүп 6-7-апрелдеги окуяга баа берүүсүн өтүндү. Тейит айылында аны жактоочулардын алдында чыгып сүйлөп, Бишкектеги төгүлгөн канга күнөөлүү эместигин айтты. Бул жактагы кабарчыбыз менен болгон маегинде К.Бакиев убактылуу өкмөттүн мүчөлөрү менен сүйлөшүүгө даяр экендигин да билдирди.
Жалал- Абад облусундагы кырдаал көзөмөлдө турат. Областтык бийлик мамлекеттин бүтүндүгү менен элди бөлүнүп-жарылуудан, тынчтыкты сактоонун амалын көрүүдө. Көпчүлүктү эртеңки курултайда облустун губернатору ким болот деген суроо ойлонтууда. 7- апрелде Бишкекте болгон чоң калабага тынчсызданып, андан бери улантылып жаткан талап- тоноочулук окуяларга миңдеген адамдар кабатырланууда.
Бүгүн түшкө дейре Жалал-Абад облусунун калкы президент К. Бакиевдин кайда экендигин биле алышпады. Ал тууралуy облустук бийлик да кабарсыз. Облус губернатору Кошбай Масиров Жалал-Абадда президент К. Бакиевди коргоо комитети түзүлгөнүн бүгүн чогулган элге жар салды.
7-апрелде Жалал-Абат облусунун Аксы районунда элдик бийлик орнотулду. Аймакта Элдик курултай президент менен район акиминин кызматтан кетүүсүн талап кылды. Өлкөдө социалдык-экономикалык абалга начар деген баа берилип, жогорку бийликке нааразылыктар айтылды. Аксынын акими район башчылык кызматты нааразы болгондор эмес, президент чечээрин белгилеп, кызматтан кетпей турганын билдирди. Жалал-Абат облусунун башка тургундары бийлик элге кам көрүп жатканын ырасташууда. Элдик курултайга уюштуруучулардын маалыматы боюнча 1500, район акиминин сөзү боюнча 300 адам катышты.
Өнүктүрүү фонду “Азия универсал банк” аркылуу айыл чарбасын өнүктүрүүгө насыя акча бере баштады. Дыйкандар 23% үстөк менен төрт айдан бир жылга чейин берилүүчү насыя дыйканчылыкты көтөрмөлөмөк тургай, артка тартарын айтып, даттанышууда. “Адам жана базар” аттуу экономикалык программанын кезектеги чыгарылышы ушул маселеге арналды.
24-мартта ыңкылаптын беш жылдыгы анын баштапкы очогу болгон Жалал-Абадда белгиленди. Ыңкылаптын катышуучуларынын пикири боюнча бийлик беш жыл мурдагы убадаларын аткарбады. Үй-бүлөлүк башкаруу кулаган жок. Бүгүн 2005-жылдагыдай күн сайын облбийлик алдында нааразылык иш чарасын өткөрүү мүмкүн эмес. Бийлик экс-президенттин тушундагы кызматкерлерден арылбай, демократиялык баалуулуктар артка кетүүдө.
17- мартта Аксы окуясында каза болгондорду эскерүү митинги болду. Анын катышуучулары Аксы окуясынын чыныгы күнөөкөрлөрүн таап жазалоо, отун-суу акысын арзандатуу жөнүндө талаптарды коюшту.
15-мартта «Ата Мекен» партиясынын Жалал-Абаддагы мүчөлөрү ур-токмокко кабылышты. Алар белгисиз адамдардын кол салуусун бийликтин буюртмасы менен маалымат таркатууга тоскоолдук катары сыпатташууда.
БЭКтин Аксы районундагы бөлүмү 17-мартта мөөнөтсүз митинг, пикеттерди өткөрүүгө даярданууда. Мындан сегиз жыл мурдагы каргашалуу окуяда жакындарын жоготкондор бейкүнөө кан төгүүнүн айыпкерлери мыйзам жоопкерчилигине тартылбай калганына нааразы болуп келатышат.
1-мартта Сузак райондук соту кичинекей кызды зордуктаган Хамза Шаруевге карата чечимин чыгарды. Хамза Шаруев Кылмыш кодексинин 129-беренесинин 4-бөлүмү боюнча айыптуу деп табылып, өмүр бою эркинен ажыратылды. Соттун жүрүшүндө ал күнөөсүн мойундаган жок.
Ынтымак курултайына оппозициянын Жалал-Абад облусундагы өкүлдөрү катышпай турганын билдиришти. Ошол эле учурда облустагы бийлик өкүлдөрү курултайга оппозициянын катышуусун эп көрүүдө. Алардын белгилешинче, курултайг бийлик көрсөткөн адамдар эмес, эл ишенген инсандар шайланды. Оппозициянын коомдук- саясий турмуштан четте турганы туура эмес.
Дагы жүктөңүз
