Түркмөнстандын телеканалдары кабарлагандай, 20-ноябрда Межлистин мурдагы депутаттарынын ордуна үч округда шайлоо өткөрүлгөн. Алардын биринде түркмөн президентинин 32 жаштагы уулу Сердар Бердимухаммедов жеңип чыкты. Ахал облусунун Душак округундагы бул шайлоодо президенттин уулу добуштардын 82 пайыздан ашыгын, анын атаандашы 17 пайызын алган.
Түркмөнстандыктар Борбордук шайлоо комиссиясынын жыйынында кенже Бердимухаммедовго депутаттык күбөлүк тапшырылганына күбө болушту.
Дүйнөдөгү эң жабык жана тыкыр көзөмөлдөнгөн өлкөлөрдүн бири деп саналган Түркмөнстандан келген бул кабар бозгундагы түркмөн саясатчыларынын көбүн таң калтырган жок.
Австрияда жашаган Түркмөн республикачыл партиясынын башчысы Нурмухаммед Ханамов Сердар Бердимухаммедовдун болочокто атасынын мураскоруна айланарынан күмөн санабайт:
- Бердимухаммедовдун үч карындашы, үч күйөө баласы жана балдары Түркмөнстандын дээрлик бардык тармактарын көзөмөлдөшөт. Аларсыз чөптүн башы да кыймылдабайт. Бердимухаммедовдун өзүнүкү го түшүнүктүү. Бирок ылдыйкы баскычтар Бердимухаммедовдордун үй-бүлөсүнүн колунда. Андыктан президенттин уулунун депутат болушунда таң калычтуу эч нерсе жок. Бүгүн уулун, кийин небересин депутат кылат, анан убагы келгенде экөөнүн бирөөсүн мураскор кылып дайындайт.
Гурбангулы Бердимухаммедовдун көргөзмөдөгү портрети.
Президенттин бир уулу жана үч кызы бар. Кыздары тууралуу көп маалымат жок. Бердимухаммедов уулун былтыр июль айында Тышкы иштер министрлигиндеги жетекчилик кызматка дайындаган. Ага чейин Сердар Бердимухаммедов айыл чарба министринин орун басары сыяктуу бир катар өкмөттүк кызматтарда иштеген.
Мындан сырткары ал өткөн жылы техника илимдеринин доктору наамын ийгиликтүү жактаганы кабарланган. Түркмөн республикачыл партиясынын башчысы Нурмухаммед Ханамов президенттин уулу тууралуу маалыматтары менен бөлүштү:
- Ал көбүнесе көмүскөдө болуп келген. Бердимухаммедов ар дайым өзү менен кошо небересин гана алып жүрчү. Керек болсо расмий иш-чараларда да анын жанында небереси турчу. Президенттин уулу жөнүндө маалыматтар дайыма эле позитивдүү болгон жок. Анын “сайрандаганды жакшы көргөнү жана тажик президентинин уулу менен дос болгону, алар Эмираттарга барып эс алышканы” тууралуу маалыматтар айтылып жүрөт. Жаш кезинде кандай болсо да анын акылы бар жана атасынын абройун сакташы керек болот”.
Бердимухаммедовдун Ашхабаддагы эстелиги.
“Аркадаг” же “Коргоочу” деген титулу бар Гурбангулы Бердимухаммедов 2006-жылы Сапармурад Ниязов көз жумгандан бери Түркмөнстанды башкарып келет. Жакында өлкөнүн Конституциясын өзгөртүү боюнча референдум өтүп, анын жыйынтыгы менен президенттин мөөнөтү беш жылдан жети жылга узарды.
Мындан сырткары президенттикке талапкерлердин жаш курагын чектеген берене да жокко чыкты. 59 жаштагы Бердимухаммедовдун каалашынча президент болуп шайланышына 70 жаштык чектөө гана жалгыз тоскоолдук эле. Түркмөнстанда президенттик шайлоо 2017-жылдын 12-февралында өткөнү турат.
Нейтралитет саясатын алга сүрөгөн, мунайга бай Түркмөнстандагы адам укуктарынын абалы эл аралык уюмдардын сынына кабылып келет.
PS: "Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.