Депутаттар Жамшитовдун пландарын өзү менен суроо-жооп иретинде талкуулашты. Коалицияда КСДП, "Бир Бол", "Кыргызстан" жана "Республика - Ата Журт" фракциялары бар. Жамшитовду башкы прокурорлукка жактыруу маселеси 25-апрелде Жогорку Кеңештин жалпы жыйынында каралат.
Коалиция жыйынында депутат Рыскелди Момбеков башкы прокурорлукка көрсөтүлгөн Өткүрбек Жамшитовду эртелей мактай бербеш керек экенин айтты:
- Азыртан мактап жатасыңар. Эртең депутаттарга каршы кылмыш иштерин ачышы да мүмкүн. Башынан эле мактай бербей, талаптарды коюшуңар керек, - деди КСДП фракциясынын депутаты Момбеков.
КСДП фракциясынан Дастан Бекешев талапкерден айлыгы тууралуу сурады. Өткүрбек Жамшитов Жалал-Абад облусунун прокурору болуп турган кезде 30 миң сом маяна менен иштегенин айтты.
Эл өкүлү прокуратура кызматкерлери айдап жүргөн кымбат баалуу автоунааларды мисал келтирип, алар айына 30 миллион сом маяна алып жаткандай элес калтырарын айтты. Бекешев муну коррупцияга байланыштырып, башкы прокурлукка көрсөтүлгөн Жамшитовду ушул маселеге көңүл бурууга чакырды.
Жамшитовду бул кызматка президент Сооронбай Жээнбеков сунуш кылган. Алгач анын талапкерлигин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитет жактырган.
43 жаштагы Өткүрбек Жамшитов Оштун Кара-Суу районунда туулган. 2015-жылдын июлунан бери Жалал-Абад облусунун прокурору болуп иштеп келет.
Парламент мурдагы башкы прокурор Индира Жолдубаеваны президенттин сунушу менен 11-апрелде кызматтан кетирген.