“Азаттык”: Жази, азыр кантип жатасыздар, кайдасыздар?
Жази Келгенбаева: Биз ошол жер титирөө болгон Кумамото шаарында жашайбыз. Азыр биз эвакуацияланып, башка шаарга чыгып кеттик. Токиого кетели деп жатабыз.
“Азаттык”: Ал жердеги тургундардын баары Токиого кетип жатабы?
Жази Келгенбаева: Жок. Чет элдиктер гана чыгарылып жатат. Элчилик же жоопкерчиликтүү уюмдар өз жарандарын алып чыгып кетүүдө. Биз кечээ элчилик менен байланышканбыз. Билет бүгүнкүгө туш келип, башка шаарга багыт алдык.
“Азаттык”: Азыр кандай транспорт менен кетип жатасыздар?
Жази Келгенбаева: Өзүбүздүн автоунаа менен баратабыз. Жол тыгын болуп, башка шаарга жетүү кыйынчылык туудурууда. Шаарда аэропорт жабылып калган да. Анан башка шаарга жетип, мейманканага түнөйбүз. Эртең менен Токиого самолет менен учабыз го.
“Азаттык”: Кумамотодо канча кыргызстандык бар?
Жази Келгенбаева: Бул жакта Кыргызстандын эки эле жараны бар. Мен өзүм эле жүрөм. Жанымдагы эже үй-бүлөлүү.
“Азаттык”: Ошол жер титирөө болгон күнү сиз кайда элеңиз?
Жази Келгенбаева: Бейшемби күнү кечинде болду. Саат тогуз жарым болуп калган. Жатаканада жалгыз болчумун. Бул жакта негизи аз-аздан жер титирөө болуп турат. Бирок мынчалык деңгээлде болгонун көргөн эмесмин. Ошол күнү аябай катуу болуп, текчеден китеп, буюмдарым кулай баштаганда жатаканадан чуркап чыгайын десем, эшик автоматтык түрдө жабылып калыптыр. Анан арткы эшиктерден чуркап чыксам, элдин баары көчөдө экен. Бул жатаканада бүт чет элдиктер, сырттан келгендер жашайт. Баары эле ызы-чуу түшүп жатты. Анан ал жактагы жапондор келип, бизди тынчтандырып, башка жакка көчүрүштү. Түнү бою жер силкинип чыкты. Таң аткыча уктай албай, титиресе эшикке чуркап, токтосо кайра биринчи кабатка кирип жүрдүк.
“Азаттык”: Бүгүн түндө болгон жер титирөө да катуу болдубу?
Жази Келгенбаева: Түнкү саат бирге жакын мурункудан да катуу силкинди. Коркуп, африкалык дос кызымдын үйүндө жаттым. Жергиликтүү, бирок үйлөрү урагандар көчүп чыгышты. Үйү бүтүндөр эч жакка кеткен жок го.
“Азаттык”: Сиздер Токиодо качанкыга чейин болосуздар, Кыргызстанга кайтасыздарбы?
Жази Келгенбаева: Абал тынчыгыча Токиодо болуп турабыз. Үйдөгү ата-энем сарсанаа болуп, Кыргызстанга келе бер деп жатышат. Бирок бул жакта жумушту таштап кете албайбыз да. Абал тынчыганда байкап, кайра эле кайтабыз го.
Жапониядагы жер титирөө
Жапониядагы жер титирөө