Ак буланы күчтүү аял терет

Теримчи аял.

Пахта жыйноо оңой эмес. Кечке ийилип иштеш керек. Белдерине байланган этекте 8-10 килограммга чейин ак була болот.

Ноокенде коомчулук арасында "аялдын баары пахта терүүгө милдеттүү" деген түшүнүк да калыптанып калган. Талаа ишине чыдай албаган кыздар сынга кабылат.

Аялдар пахтаны таразага алып бара жатышат.

Пахта терүү аялдардын киреше тапчу булагына айланган. Ар бир килограммына 5 сомдон 7 сомго чейин акы алышат. Аны пахтанын ээси төлөйт.

Пахта көп айдалган жерлерде кыз-келиндердин баары ушул күндөрү талаада жүрүшөт

Аялдардын айрымдары бир күндө 60-70, кээ бирлери 110 кг пахта теришет.

Күндүз пахта терип, кечинде үйгө барып балдарга тамак-аш жасап, кир-когун жууган аялдар таң атканда кайра эле талаага жөнөшөт.

Пахта сезону бүтмөйүнчө эс алууну ойлошпойт деле. Түмөн-түйшүккө карабай, наалыган аялды көрбөйсүз.

Аялдардын баары бети-башын жоолук менен ороп алышкан. Антпесе, пахтага чаң көп жабышат. Ден-соолукка олуттуу зыян келиши мүмкүн. Колдорунда колкап.

Ачылган пахта

Пахта ташып бараткан дыйкан

Эркектердин милдети - аялдар терген пахтаны талаадан үйгө ташуу.

Аялдар кээде балдарын да өзүнө жардамчы кылып талаага алып чыгышат.

Пахта талаасы

Бир гектар жерден ар ар теримде болжол менен бир-бир жарым тонна пахта чыгат. Августтан ноябрга чейин үч-төрт жолу терим уюштурулат.

Ак буланын баары колдо жыйналат. Беш-алты аял бир гектарды эки күндө жыйнап коюшат.