Азыр алдыда бийлик түрүн тандоо (референдум), президенттик шайлоо деген өнөктүктөр турат. Анын шаӊында калкыбыз “коронавирус” пандемиясы дегенди деле унутуп, шатыра-шатман той-топуруна жана жыйындарына кайра киришип алгандай.
Ушундай кырдаалда босогодон кирип келген жаӊы жылга карата элибизге каалоо-тилек иретинде ушул темадагы ырларымды сунуш кылам.
* * * * * * *
Бийлик кумары
Бийлигиӊ – баш кошушкан аялыӊдай,
Аны сен эч ким менен бөлүшпөйсүӊ.
Дөөлөттүн туу чокусу опурталдуу,
Ага сен оӊой менен жетишпейсиӊ.
*** *** *** *** ***
Көрө албай туу чокуга жеткениӊди,
Тагыӊды талашкандар көп болушат.
жалгызсыӊ, жаза тайсаӊ кадамыӊдан,
Сени алар баса калып жеп коюшат.
*** *** *** *** ***
Такты бир, дөөлөтүӊ бир, өзүӊ да бир.
Аларды ажыратып бөлө албайсыӊ.
Кечээги жоро-жолдош, дос-жарлардан -
Алыстап, көпкө дейре көнө албайсыӊ.
*** *** *** *** ***
А бирок арга канча, бийлик деген –
Жытыгып жыты сиӊет жакыныӊдай...
Сен андан кете албайсыӊ, ал да кетпейт,
Кызганчаак, кылыгы күч катыныӊдай...
* * * * * * *
Ак шоокум
Кудайга да, шайтанга да ишенбес,
Эс оодарган эчен кыйын күн болду.
Бизди куурал бу турмушка туш кылган,
Жаратканбы, азезилби, – ким болду?..
*** *** *** *** ***
Бирок, кандай каатчылык болсо да,
Мен ишенем бул жашоодо бир гана –
Өз өлкөмө, өз калкыма, Мекенге,
Андан башка болбойт мага – Нирвана.
*** *** *** *** ***
Эли-журтум адилдик деп азап жеп,
Канча шорду өз башынан кечирди.
Ошолорду көргөн сайын негедир –
Көрөм мен да автопортретимди...
* * * * * * *
Маскарад-шайлоо
Калайык калкыбызда какшык менен
“жепутат” атка конгон бир топ “берен”
Шайлоого аттанышты канча жолу –
капчыкта акча кенен, акча белен.
*** *** *** *** ***
Адам-зат акчалууга кул экенин,
акчасыз аракетиӊ кур экенин.
Шайлоодо электорат-элден мурда,
эӊ обол чечүүчү күч - пул экенин:
*** *** *** *** ***
эӊ сонун билгени үчүн, масхалатка –
жамынып жаштар деген “жаш канатка”
карт бөрү “жепутаттар” ат салышып,
жөнөшөт “Шайлоо” аттуу маскарадка.
*** *** *** *** ***
Аныгы айдан ачык – бул жарышта
киши эмес, чындыгында, пул - жарышта.
Калайык мындай жалган шайлоолорго,
ишембейт, көнүп калган кур калышка.
*** *** *** *** ***
Айланбай ашка жетпес ачка жанга,
байланбай кара курсак ашказанга -
Кыргыз эл бар болсо экен түбөлүктө,
кор болбой маскарапоз маскачанга.
Пандемия
Ааламга кан айлантып, жан салган материя -
жаралганы бактерия, микроб, вирустардан.
Оожалып жашоо-турмуш огожо гумустардан,
туу чоку Олимпинде адамзат туруп калган.
*** *** *** *** *** *** ***
Бүр алып бир клетка-амёбадан урук-заты,
буралып өөрчүй берген өлөрман клеткасы.
Канында кайнагандан жайнаган микрозат,
ошондон татаалдаган табигый генетикасы.
*** *** *** *** *** *** ***
Ал жашайт ыбырсыган микро-ааламында,
сыр эмес азыр ага “генетикалык коду” дагы.
А бирок “Ковид”деген вирустун апаатында,
Үйдөн чыкпай бүрүштү го үлүлдөй кутудагы.
*** *** *** *** *** *** ***
Демек, адам кудуреттүү демиург-кудай эмес.
Ал макулук кулпенде - табигат жасап койгон.
Кокус “Ковид” же да бир дабаасыз микробдон,
кутула албай жер жазданат жасат бойдон.
*** *** *** *** *** *** ***
Жаралгандан канына кошо бүткөн адатыбы,
Адамзаты негедир арыла албайт уруштардан.
Жан дүйнөсүн аруулап, тазартпаса айланасын -
Жаратылыш өч алат, тумоо жайып вирустардан.
* * * * * * *
“Ковид” кошогу
Күлдү адамзат эч капарсыз күтүнбөй
турган кезде Жердин жүзүн бүтүндөй
“Ковид” деген тумоо каптап, канчалар –
тумчугушту не болгонун түшүнбөй.
*** *** *** *** *** ***
Адамзаттан жадаганда Жараткан –
жазыгына туш кылдыбы бу күндү?
Айтор апаат жоо чапкандай кыйратты,
аяган жок алсызды да, “кыйынды”.
*** *** *** *** *** ***
Карайлашып канчалаган калайык,
тагдырлары “Ковид” менен байланды.
Таажы вирус тажаал менен алышуу –
Адамзаттык алааматка айланды.
*** *** *** *** *** ***
Ким биле алат, оо боорлош туугандар!
Эртеӊ тагдыр кандай болуп каланат?
Азырынча ар бирибиз шон үчүн –
бирибизге бирибизбиз аманат...
* * * * * * *
Тирүүлүккө тилек
Оомал-төкмөл, өзгөрүлөт бу дүйнө.
Анда, сөзсүз, жоготуулар көп болот.
Ошентсе да абийириӊден айрылба,
Ансыз сенин адамдыгыӊ жок болот.
*** *** *** *** ***
Опоосу жок, оодарылат дүнүйө,
Сөз жок, анда унутуулар көп болот.
Бирок ыйык парызыӊды унутсаӊ –
Ата-энеӊ да, Мекениӊ да жок болот.
*** *** *** *** ***
Берээриӊин баарын бергин, аяба.
Сараӊ болуп, көӊүлдөрдү калтырба.
Бирок дагы, бирок дагы эч качан –
Намысыӊды, намысыӊды алдырба!
*** *** *** *** ***
Бийиктерге жетпедим деп кейибе,
Жашоо - арман, акырында кетесиӊ.
бийиктердин эӊ бийиги, ошондо–
өз өмүрүӊ экендигин сезесиӊ...
адабиятчы, сынчы, философия илимдеринин кандидаты.