Министрлер кабинетинин төрагасы Адылбек Касымалиев Астанадагы расмий сапары алкагында Казакстандын президенти Касым-Жомарт Токаев менен жолукту. Бул тууралуу маалымат кыргыз өкмөтүнүн сайтына 25-февралда жарыяланды.
Ага ылайык, тараптар кыргыз-казак чек арасындагы жүк ташуучулардын кезек күтүүсүн жоюу үчүн электрондук система киргизүүнү, өткөрүлүп жаткан жүктү текшерүүнү жеңилдетүүнү талкуулашты.
Ошондой эле саясий, соода-экономикалык, суу-энергетика, маданий-гуманитардык жана башка тармактар боюнча кызматташууну тереңдетүү жана толук ишке ашыруу маселелери каралды.
“Кичи-Капка – Бесагаш жана Камышановка – Ак-Суу өткөрүү пункттарын ачуу боюнча жүргүзүлүп жаткан иштер тууралуу сүйлөшүлдү”, - деп жазылган маалыматта.
Адылбек Касымалиев Астанага сапарынын алкагында 24-февралда Казакстандын өкмөт башчысы Олжас Бектенов менен жолугуп, эки мамлекеттин кызматташтыгын талкуулаган. Анда 2024-жылда эки өлкө ортосундагы соода жүгүртүүнүн көлөмү 1 млрд 340 млн долларды түзгөнү, 2030-жылга чейин 3 млрд долларга жеткирүү керектиги белгиленген.
Кыргызстан менен Казакстандын ортосунда жалпы беш көзөмөл-өткөрмө бекети бар. "Каркырадан" тышкары Чүй облусунда “Ак-Тилек”, “Чалдыбар”, “Ак-Жол” жана Талас облусунда “Чоң-Капка” өткөрмө бекеттери иштейт.
Чек арада жүк ташуучу автоунаалардын узун кезеги утур-утур катталып турат.