Кыргызстандын Соттор кеңеши судьялар Арзыбай Абдураимовдун, Айвар Кубатовдун жана Улан Садырбековдун отставкага кетүү арызын канааттандырды. Мындай чечим кеңештин 24-январындагы отурумунда кабыл алынганы маалымдалды.
Үч соттун ыйгарым укуктарын мөөнөтүнөн мурда токтотуу чечими андан ары президенттин кароосуна сунушталган.
25-декабрда президент Садыр Жапаров Арзыбай Абдураимовду Бишкек шаардык сотунун судьясы кызматынан убактылуу четтетүү жарлыгын чыгарган болчу.
Ага чейин Башкы прокурор аны кылмыш жоопкерчилигине тартууга уруксат сурап, Соттор кеңеши макулдугун берген.
2024-жылдын декабрынын ортосунда Улуттук коопсуздук боюнча мамлекеттик комитет Бишкек шаардык сотунун судьясы жана анын жубайы алдамчылыкка шектелип жатканын кабарлаган.
Калган эки судьянын арызынын себеби маалымдала элек. (KbA)