️Орусиянын премьер-министри Михаил Мишустин Кыргызстандын Министрлер кабинетинин төрагасы Адылбек Касымалиев менен жолукканда Кыргызстандын мамлекеттик органдарынын орусиялык компанияларга кысымын жана негизсиз дооматтарын токтотуусун талап кылганын орустардын ТАСС мамлекеттик агенттиги жазды.
“Бизди Кыргызстандын мамлекеттик органдарынын жогорку өкүлдөрүнүн кыргыз экономикасын өнүктүрүп, жаңы жумуш орундарын түзүп жаткан, чынчыл, абийирдүү орусиялык компанияларга негизсиз дооматтары жана мыйзамсыз билдирүүлөрү тынчсыздандырат", - деди Орусиянын өкмөт башчысы. Бирок премьер Мишустин кайсы компаниялар экенин ачык айткан жок.
Мишустин кызматташы Касымалиевге “мыйзамсыз, кээде опузалап акча талап кылуу фактылары Орусиянын Тышкы иштер министрлигинин нотасында белгиленгенин” эскертип, кыргыз бийлигинен орусиялык компанияларга административдик кысым көрсөтүүнү токтотуп, укуктарын жана мыйзамдуу кызыкчылыктарын коргоону камсыздоону өтүндү.
ТАСС билдиргендей, Касымалиев бул маселе боюнча Кыргызстанга барганда сүйлөшүп, өзүнчө маалымат берүүнү убада кылды. Расмий Бишкектин маалыматында сүйлөшүүдө андай маселе көтөрүлгөнү тууралуу айтылган эмес.
Кыргыз өкмөтүнүн маалыматына ылайык, тараптар эки өлкө ортосунда түзүлгөн стратегиялык өнөктөштүктүн алкагында энергетика, өнөр жай, айыл чарба, билим берүү жана санариптик экономика тармактарында ири долбоорлор ишке ашырылып жаткандыгын белгилешти.
Жолугушууда ЕАЭБ алкагында өз ара иштешүүнү күчөтүү маселелерине жана башка аймактык демилгелерге өзгөчө көңүл бурулганы кабарланды.
Касымалиев менен Мишустин Алматы шаарында өткөн Евразиялык өкмөттөр аралык кеңештин жыйынында жолугушкан.
Кыргызстандын Улуттук коопсуздук боюнча мамлекеттик комитети (УКМК) былтыр, 29-ноябрда ири өлчөмдө салыктан качуу фактысы боюнча козголгон кылмыш ишине байланыштуу “Яндекс.Такси” ишканасынын жана өнөктөштөрүнүн кеңселеринде тинтүү жүргүзгөн.
Мурдарак Монополияны жөнгө салуу кызматы “Яндекс.Такси” компаниясын Кыргызстандын такси рыногунда монополист деп тапкан. Коомчулукта ишкана бааны өтө эле жогорулатып жибергени тууралуу нааразылыктар айтылып келет. (ZKo)
Дагы караңыз
Орусиядагы кылмышы үчүн жазасыз жүргөн кыргыз жарандары боюнча маселе парламентте көтөрүлдүИзраил "Хезболланы" жарашуу келишимин бузду деп, Ливандагы буталарга сокку урдуDemirBank "Керемет банк" менен операция жүргүзүүнү токтоттуАктауда кызды уурдап зордуктагандардын бири өмүр аягына чейин кесилди20 миң жана 65 миң сом айып пул. Жапаров талаштуу мыйзамга кол койдуВолгограддагы мунай иштетүү заводу дрон чабуулуна кабылганы кабарланды