Казакстанда бүгүн 21-ноябрда парламенттин жогорку палатасы да "Орус тили боюнча эл аралык уюмду негиздөө тууралуу келишимди ратификациялоо жөнүндө" мыйзам долбоорун карап, жактырды. Документ кечээ төмөнкү палатада биринчи окууда кабыл алынган. Бул тууралуу "Азаттыктын" казак кызматы жазды.
Мындай уюмду түзүүнү өлкө башчысы Касым-Жомарт Токаев сунуш кылган.
Илим жана жогорку билим министри Саясат Нурбектин айтымында, уюмдун иши Казакстандын тил боюнча ички саясатын "чектебейт жана ага таасирин тийгизбейт".
"Анын максаты орус тилин расмий жана жумуш тили катары эл аралык жана аймактык өкмөт аралык уюмдарда, ошондой эле мамлекет аралык байланыш тили катары илгерилетүү болуп эсептелет", - деди министр.
Уюмдун башкы кеңсеси Орусиянын Сочи шаарында жайгашат. Орус тилине эл аралык колдоо көрсөтүү тууралуу келишимге 2023-жылы Көз каранды эмес мамлекеттердин шериктештигинин (КМШ) президенттеринин Бишкектеги саммитинде кол коюлган. 2022-жылы Астана саммитинде Токаев мындай уюм түзүүнү сунуш кылганда Орусия президенти Владимир Путин анын идеясын Орусия колдобой коё албай турганын айткан.
Казак парламентинин Сенатынын эл аралык иштер комитетинин төрагасы Андрей Лукин келишимди бекитүү жараяны Орусияда, Беларуста, Кыргызстанда жана Өзбекстанда аяктаганын айтты.
Борбордун иши ар бир өлкө чыгарган мүчөлүк төлөмдүн эсебинен каржыланат. Казакстан 2025-2027-жылдары республикалык бюджетинен 131 миллион теңге сарптай турганы айтылды. (RK)
Дагы караңыз
Беларуста дагы 32 саясий туткунга ырайым берилдиАКШ Украинага мина жөнөтөтНоокатта жетекчисине арызданган милиционер кызматтан алынды ТИМ: 72 миңдей кыргызстандык Орусияда миграциялык мыйзамдарды бузуп жүрөт